SUPP nemu, maya ngulihka sukung di parlimen suba, semua MP ari gempung BN nyukung sistem GST dikena
// Dikarang Chris Bishop //
KUCHING: Pengawa raban Parti Se’ati Rayat Sarawak (SUPP) pampang Kuching ti deka ngatur kimpin ngulihka 500,000 sain jari rayat, nulak Sistem Chukai Barang enggau Servis (GST) ba Sarawak enda setipak enggau penemu kaban parlimen ari parti nya.
Mansutka jaku tu Chairman DAP Sarawak Chong Chieng Jen madah, sida (SUPP) patut mansik rikod di parlimen dulu ke alai Sapit Presiden SUPP Datuk Seri Richard Riot ke nyadi MP sereta menteri dalam kabinet udah ngundi nyukung GST.
“Diatu enti SUPP deka ngemajakka kimpin nya, komiti sida patut dulu ngukum Riot ketegal ti udah nyaup ngemendar Akta GST dikena di menua tu.
“Enti MP ari gempung Barisan Basional (BN) Sarawak enda ngundi nyukung suba, Akta GST nya enda dikena ketegal parlimen enda teulihka majoriti lebih 51 peratus sukung,” ku Chong.
Akta GST dibantaika di parlimen pengudah tembu pengawa bepilih taun 2013 lalu dikemendar diguna pengudah nerima sukung majoriti MP BN. Semua MP ari penyakal nulak akta nya rambau dibantai, tandu Chong.
Iya ke mega MP Bandar Kuching enggau Kaban Kunsil Nengeri (ADUN) Kota Sentosa ngasaika SUPP pampang Kuching udah enda seperau enggau MP tauka ketuai sida sentang pekara tu.
Pekara nya ku Chong ,mandangka MP ke mega nyadi seiku menteri nyukung GST di parlimen tang ba renggat baruh, kaban parti sida minta GST enda diterit di nengeri tu ngambi tau teulihka sukung ari rayat.
“Pekara tu ngasuh kitai ketawa sereta sebengkah ulah nipu ba pengawa politik,” ku Chong.
Chairperson SUPP Pampang Kuching Datuk Lily Yong kemari (Hari Satu) netap sida deka ngelanchar kimpin ngulih 500,000 sain jari kena 13 Oktober 2015 tu.
Ku Lily kimpin nya dikena ngansak perintah besai ngelaung sistem GST diteritka di Sarawak.
Iya ngasai kenyau 1 April 2015 tu tadi, maya GST berengkah diguna, rayat nengeri tu udah balat napi pemerinsa.