Dikarang Jacqueline R. David //
BUP POLITIK ORANG INDU: Taib enggau Ragad (tengah) begambar enggau bala bukai pengudah bejadika sebuah bup ngenang 13 iku indu orang indu ke udah pegari nama ba pengawa politik di nengeri tu.
KUCHING: Raban orang indu rebak baru di menua tu dilalau anang semina ngereja pengawa profesional aja, tang sida mega patut ngambi bagi ba pengawa politik, ku Tuai Pemegai Menua (TYT) Sarawak Tun Pehin Sri Taib Mahmud.
Pemujur orang indu di menua tu majak nyengala dipeda nengah pengawa ngemansangka komuniti lalu tu ulih ngerintis pemanah pengawa sida ngambika dipurih raban nembiak indu di menua tu.
“Pengawa politik kitai di menua tu sigi besai, orang indu endang udah nyendiakan diri dalam politik kenyau ari dulu kelia, dipelaba bepun ari jeman perintah Rajah Brooke,” ku Taib.
Iya madah munyi tu lebuh bejadika bup ‘Sarawak Women in Poilitics: The Pioneers’ ti dikarang seiku penulis Iban tebilang Christina Thomas-Mamora ke digaga beserimbai enggau Hari Orang Indu ti deka disambut bulan dudi, di Komplek DUN Lama ditu, kemari.
“Aku ngarapka bup tu ulih nyadi peransang ngagai rebak nembiak kelebih agi sida ke indu, nyangka bala nembiak indu ukai semina betatika pengawa profesional tang mega ngemeratka politik laban orang indu patut disengkaum dalam politik,” ku iya.
Ngenang pemansang politik di Sarawak, Taib madahka iya bepun berengat, dirintis orang lelaki lalu disukung sida ke indu.
Iya madah, politik dalam taun 50-an kelia, dipungkal Parti Sa’ati Rayat Bersatu (SUPP), Parti Negara, Berjasa, SNAP enggau Pesaka.
Nengah politik bala ketuai ke bisi penau nyengkaum ari menua pesisir bisi dibai ngeringka menua nyadi menua merdeka, ku iya.
“Taja pia kitai beratika entara bala ketuai nya bisi 13 iku sida ke indu bisi ngambi bagi dalam politik dikenang dalam bup tu.
“Tu berindik ari pemesai nengeri Sarawak ngujungka politik kitai bisi ba selampur menua,” ku iya.
Taja pia, ku iya pengawa sida ke indu tu mungkur semua pupu bansa.
Kelimpah ari nya, Taib madah maya kelia politik ke bisi besangkut paut enggau orang indu, bisi dua buah parti ke agresif terus mujur di sitak menua pesisir, ngarika komuniti Melayu, iya nya Parti Negara enggau Parti Berjasa, sebedau ke berakup nyadi parti Bumiputera.
Maya nya, parti SNAP nyingkang ngiring bala Iban enggau ke ukai Iban, tang Pesaka laun mimit datai laban Apai Jugah maya nya enggai meda parti di Sarawak enda begempung.
“Nya alai, kitai beratika kemaya hari tu, kerejasama entara semua pupu bansa udah chukup besedia lebuh BN ke mai China di SUPP ngambika ulih begulai betatika nasit rayat Sarawak.
“Kitai beratika pupu bansa majak nyingkang ke mua taja pan politik komuniti China kurang dipasuk sida ke indu,” ku iya.
Taja pia, parti SUPP penapat meransang pejalai komiti indu sida nengah pemesai baka Barbara Bay ke ukai China tang Iban.
“Nya alai, dalam bup tu ‘Sarawak Women in Politics: The Pioneers’ nyadi rikod ngambika nembiak kemaya hari tu ulih neladan pengawa orang ke dulu suba dalam pengawa politik,’ ku iya.
Dalam bup nya, ngelansa pengawa orang indu ke bagas bepolitik jeman kelia, iya nya Datuk Ajibah Abol, Baidah Salleh, Barbara Mendu Bay, Bibi McPherson (indai Nancy Shukri), Chi Mei Si, Hadiah Yaman, Hau Ngo, Datuk Paduka Jorkinah Hashim, Lily Eberwein (indai Datuk Hafsah Harun), Lucy Sanyin Miku, Dato Sri Philomena Tra Zehnder, Datuk Sharifah Mordiah Tuanku Fauzi, enggau Datuk Paduka Sharifah Rehanah Syed Razali.
Sama bisi datai bini Taib, Toh Puan Dato Sri Ragad Kurdi Taib, Menteri Pengelantang Pendiau, Orang Indu enggau Pemansang Diri Sebilik Datuk Fatimah Abdullah, Menteri Muda Pengelantang Pendiau (Pelajar Tumu Anak Mit) Rosey Yunus, Menteri Muda Pengelantang Pendiau Robert Lawson Chuat enggau Menteri ba Opis Menteri Besai Nancy Shukri.