MUKAH: Sarawak patut nambahka penyampau rayat dikena nyaup ngemansangka nengeri tu ke dipelaba majak maju jemah ila.
Sapit Kepala Menteri Datuk Patinggi Tan Sri Dr Alfred Jabu Numpang madah, penyampau rayat Sarawak diatu semina 2.4 juta lalu nya dipeda bedau chukup dikena nangkup peminta dudi hari.
“Ngarapka bala apai indai ke regas, anang berumban nutup ‘kilang’ kita. Kitai agi begunaka rayat mayuh dikena ngemansangka nengeri tu,” ku iya serayaka betundi maya bejadi Konvokesyen Ke-8 Politeknik Mukah ditu, kemari.
Ari sukut pelajar, ku iya apai indai diatu ngembuan mayuh pilih alai nganjung bala anak sida ke deka belajar ba palan pelajar tinggi di nengeri tu.
“Pelajar tinggi kelebih agi dalam bidang pengelandik ngembuan makit ke chukup laku ke maya hari tu.
“Pejalai Koridor Kuasa Dikena Baru Sarawak (SCORE) begunaka mayuh pengereja pengawa lalu tu meri awak ngagai nembiak Politeknik Mukah laban ke dibungkur kandang alai ngemansangka SCORE,” ku iya.
Tu ku iya, seriris enggau agenda Kepala Menteri Datuk Patinggi Tan Sri Adenan Satem ke bebendar deka nyungkak pemansang di kandang menua pesisir.
Jabu ke mega nyadi Menteri Betanam Betupi Moden enggau Menteri Pemansang Menua Pesisir bisi minta Opis Menteri Pelajar Tinggi berundingka pekara numbuhka Politeknik keempat di nengeri tu.
Ba pengerami nya, bisi 494 graduan ke ngambi bidang injinia awam, injinia elektrik, injinia mekanikal, bidang bedagang sereta teknologi pemadah enggau penyambung nerima Diploma sida ari Jabu. — Bernama