Dikarang Chris Bishop//
KUCHING: Asil tandan buah sawit ejensi SALCRA nambah 7,185 tan metrik taun tu, ku Chairman Datuk Patinggi Tan Sri Alfred Jabu.
Ku iya, pemujur nya dijapai asil pengeransing raban SALCRA ba pengawa ngemansangka tanah rayat enggau tuju ngemunaska penyeranta rayat ti nguan menua pesisir.
Nitihka penerang Jabu ke mega Sapit Kepala Menteri, naka 20 Ogos 2015 tu, SALCRA udah mansutka asil penyampau 343,110 tan metrik tandan buah sawit.
Jabu madah, penyampau nya nambah enti dibandingka enggau 335,925 tan metrik ungkup timpuh ke sama ba taun 2014 suba.
“Kenyau ari pun SALCRA ditumbuh iya nya ba taun 1979, kitai napi mayuh macham pemar laban rayat bedau meretika tuju SALCRA.
“Tang dalam timpuh ke udah nyentuk diatu sereta nengah embing Kepala Menteri ke dulu enggau ke diatu, SALCRA udah angkat nyadi seiti institusyen ti dipebasa.
“SALCRA ukai semina mujur ngemansangka tanah rayat ke lebih agi tanah adat bansa asal (NCR), tang mega mujur ngemunas penyeranta rayat di menua pesisir,” ku iya.
Jabu ke mega Menteri Betanam Betupi Moden enggau Pemansang Menua Pesisir mansutka jaku tu ba ‘Majlis Ramah Tamah Aidilfitri SALCRA’ malam ensanus.
Pengerami nya diatur di sebuah hotel ditu enggau tuju ngenegap kaul entara SALCRA begulai enggau opis menteri, konsultan, kuntrektor sereta pemekal ke bekait enggau pengawa SALCRA.
Ngenang pekara bukai, Jabu madah SALCRA merambu numbuhka koperasi nguna belanja ari Perintah Besai ke diberi ngagai Perintah Nengeri.
Koperasi nya ila ku iya deka mulaika pemaik ngagai lebih 22,000 penyereta SALCRA di serata Sarawak.
Ba pengerami nya mega Jabu bisi nyuaka chek pemeri ari SALCRA ngagai enam palan pengarap ke alai tetiap palan nerima penyampau RM3,500.
Enam palan ke nerima iya nya Surau Nurul Huda, Belungei Lundu, Masjid Darul Solihin, Debak, Masjid As-Sabirin, Kabong, Gereja St.Luke’s, Sri Aman, St. Theresa’s Parish Council, Serian enggau Gerija St. Christopher, Debak.
Bela datai Manijer Besai SALCRA, Datu Vasco Sabat Singkang enggau urung 500 iku pengabang bukai.