Dikarang Frankie Junau//
SKRANG: Kaban Kunsil Nengeri (ADUN) Engkilili Dr Johnical Rayong ngelalau rayat ke bisi menggi Tanah Adat Bansa Asal (NCR) nguna awak nyukat tanah sida nya berindik ari kimpin nyukat tanah NCR ke benung dipejalaika perintah diatu.
Nya alai, Rayong bisi minta bala tuai rumah enggau pengulu bejalaika pengawa sida ngerah nembiak redak pasal pekara nya.
“Enggau tu aku ngarapka kita ke nyadi ketuai ba renggat rumah panjai patut ngenataika penerang silik ngagai nembiak redak ngambika sida enda saru penemu sentang pengawa perintah.
“Jaku petenah ke ngumbai perintah deka ngerampas tanah NCR nengah kimpin patut dikemetul…dini perintah bisi deka ngerampas tanah rayat, nya jaku ke nadai patut,” ku iya rambau bejadi Projek Bekal Ai Paip Graviti beungkus RM98,000 di Rumah Jensen Nyanggau di Pematoh, Skrang ditu, kemari.
Nangkan nya, Rayong minta bala ke bisi bempu tanah ulih nguna tuai rumah diri empu madah ngagai Opis Tanah enggau Survei bejalaika pengawa nyukat tanah NCR sida ngambika uilih diberi surat pala tanah.
“Enti udah bisi surat pala tanah, tanah nya enda ulih diambi sengapa…nya alai aku ngarapka tanah ulih dikemansang enggau sawit, getah tauka lada.
“Aku mega meransang kita betanamka kayu engkabang laban batang kayu tu tau berega,” ku iya.
Ngenang pasal projek paip nya, Rayong madah tu kelai penyiru perintah Barisan Nasional (BN) ngagai rayat lalu ngarapka rayat terus nyukung perintah ngambika mayuh agi pemansang ulih digaga dudi hari.
“Nya alai anang ngemelakangka perintah diatu ke chukup siru ngagai rayat kelebih ngagai kita ke diau di menua pesisir.
Ba pengerami nya, Rayong bisi nyuaka geran MRP penyampau RM10,000 ngagai Komiti Pemansang enggau Pengelikun Genturung Pendiau (JKKK) Rumah Jensen lalu RM5,000 ungkup Gerempung Indu sida.
Sama bisi datai Kaban Parlimen Lubok Antu Datuk William Nyalau Badak, pengari Opis Tanah enggau Servei David Laing enggau bala tuai raban bansa.