KAPIT: Chairman Serakup Pengajar Sarawak (STU) Pampang Kapit, Teoh Say Beng madahka Opis Menteri Pelajar Malaysia (KPM) udah ngeluarka penetap iya nya nembiak enda tau enda pass Jaku English dalam peresa SPM 2016 ila.
Beduduk ari penetap sereta pemutus ti digaga KPM nya, nembiak sekula SPM patut bebendar agi ba pelajar Jaku English dikena nentuka sida teulihka setipikit SPM nitihka kriteria penetap nya.
Raban STU Pampang Kapit begulai enggau Opis Pelajar Pelilih (PPB) Kapit sereta raban ari sekula sekondari di Pelilih Mit Song enggau Kapit, kami udah ngatur ‘1119 English Creative Writing’ ngelaluka penyereta ari nembiak Pom Empat enggau Pom Lima ngulu pengawa sehari English Course tu. Tuju pengawa tu diatur dikena ngiring raban nembiak ngambika landik agi nulis tusun ayat dalam jaku English nitihka tanya sereta saut dalam keretas peresa nya,” ku iya lebuh bejaku bejadika pengawa sehari kus ‘1119 English Creative Writing’ diatur bepalan di Palan Sivik ujung minggu tu tadi.
Teoh ngarapka raban nembiak ngena peluang nya enggau manah sereta meretika licha ke bisi dibantaika lalu ulih belajarka sekeda teknik ti deka beguna sereta nyaup dalam pelajar sida.
Sentara nya, Penyading Penemu iya ke ngatur kus nya, Azlinda Mohd Nor iya ke mega nyadi Ketuai Fakulti Jaku English Sekula Sekondari (SMK) Selirik ditu madahka nadai chara ke muntang dalam belajarka pengelandik dalam Jaku English.
“Jaku English tu jaku ke universal. Iya seiti jaku dikena ba pengawa dagang entarabansa, commerce anda business, sereta sains enggau perubat. Pelajar jaku tu beguna bendar alai kitai meseti bebendar belajar sereta ngembuan pengelandik dalam jaku nya. Semina seiti aja chara dikena ngemanahka Jaku English kelebih agi landik tauka kreatif dalam jaku English, seruran sereta ngemeranka jaku dalam English nyentuka kitai landik. Bacha mayuh agi bup ditulis dalam Jaku English deka mantu ngemanahka jaku English,” ku iya.
Bisi 240 iku nembiak nyereta kus tu. Raban nembiak tu ari SMK Kapit, SMK Kapit 2 sereta SMK Selirik.
Pengelicha ke dikanggau meri licha dalam kus nya iya nya Wong Siong Ning ari SMK Tinggi Sarikei.
Bela bisi datai ngulu kus nya 20 iku raban pengajar je ngembuan pelajar Ngajar Jaku English Nyadi Jaku Kedua (TESL) ari SMK Kapit, SMK Song, SMK kapit 2 sereta SMK Selirik.
Sekeda raban STU ke bisi datai iya nya Sapit Chairlady, Kunchi Bantin, Sekretari Ho Jia Yiing sereta Assistant Sekretari Betty Wong, Tukang Wang Ling Leong King sereta raban ke bukai.