KUCHING: Berindik ari pemayuh peluang, pengawa dagang diatu nyelai ari tiga puluh taun ke udah, ku Tuai Megai Menua Tuan Yang Terutama (TYT) Yang Dipertua Negeri Sarawak Tun Pehin Sri Abdul Taib Mahmud.
“Aku ngelaluka pengawa ngelatih bala nembiak ukai semina dalam pekara teknikal tang mega dalam pekara ngatur pengawa ngambika sida iya nemu pasal makit lebuh sida belabuh bedagang.
“Aku beratika pengawa latih deka majak mansang jemah ila, lalu peratika raba keterubah ti udah dilatih, bakani gaya pengawa ke ulih digaga sida ngambika mayuh agi nembiak dilatih seraya ngemeratka pemansang,” ku Taib.
Iya madah munyi nya lebuh bejaku ba atur pengawa bejadika opis iCube Innovation Sdn Bhd ti dipungkal chairman kompeni nya empu, Dato Patrick Liew di Jalai Pending ditu, kemari.
Berindik ari mayuh macham pengawa latih ke bisi diatur, Taib madah iya beratika mayuh peluang ba pengawa dagang ti ulih digaga bala nembiak ke ngujungka sida sama ngemansangka Sarawak jemah ila.
“Dunya pengawa dagang penuh enggau pengawa besemekih enggau pangan diri tang iya mega penuh enggau kerejasama.
Naka kediatu, iya madah kitai beratika menua kitai empu sebuah menua ke mansang, mayuh projek besai-besai ti begunaka menijar ke bisi pengelandik.
“Lalu berindik ari nya, enti deka ngeamatka pemansang, kitai anang semina beratika pemansang di nengeri aja tang kerembaika ngagai menua pesisir sereta serata menua ke meri peluang ngagai semua raban bansa.
Ngenang sitak industri Samalaju di Bintulu ku iya, diatu udah bisi urung 10 kompeni di Samalaju.
Ari tempias kompeni nya, iya deka meri penguntung ngagai kompeni ke mit ke deka ngemansangka pengawa dagang sida.
“Pengawa dagang ke besai begunaka sukung ari pengawa dagang ke mit sereta pengawa dagang ke numbas iya, sama begunaka saup pangan diri, lalu ulih besaup ngemansangka pengawa dagang.
Baka industri kayu ku Taib, industri nya bepun ari sektor pengangkut, tang Sarawak enda ngetu naka nya aja, ku iya.
“Kitai ngemansangka modal mensia ke ukai semina betatika pengawa kayu tang mega nyadi pengatur makit ke menua Timur Tengah, Russia enggau Africa.
“Kitai eksport orang ke pengelandik ari menua kitai enggau chara muka kompeni kayu di Africa lalu nangkan nya ngaga pengawa makit ngagai Eropah,” ku iya.
“Kitai enda ulih jenuh aja laban kitai bisi semekih lalu kitai mega patut ngemansangka pengelandik ba makit ari chara kitai ngereja pengawa dagang baka suba.
“Aku empu kala meda bakani pengawa dagang ke mit suba ke enda entu tampak rita lalu diatu udah nyadi sebuah kompeni antarabansa,” ku iya.
Sama bisi nguluka atur pengawa nya kemari, Menteri Muda ba Opis Kepala Menteri (Unit Pemansang Pengawa Dagang Bumiputera) Datuk Naroden Majais, Menteri Muda Pemansang Nembiak (Nengeri) Datuk Abdul Karim Rahman Hamzah enggau Menteri Muda ba Opis Kepala Menteri (Pengatur Pemansang Pelajar Teknikal) Datu Len Talif Salleh.