SAMA GAGA: Fatimah begulai enggau atlet spesial ngelantang ati.
SIBU: Menteri Pengintu Pengelantang Pendiau Pemansang Orang Indu enggau Ruang Bilik, Fatimah Abdullah deka nganjung keretas kereja ngagai perintah nengeri minta insentif diungkupka ngagai raban atlet ‘Special Olympics Sarawak’.
Ku Fatimah, ke nyadi Presiden Special Olympics Sarawak, raban atlet tu udah ngemanahka nama menua sereta nengeri tu dalam tikas diri sereta iya berasai temegah ati ke pemujur ba pemutus Special Olympics World Summer Games ke diatur di Los Angeles, United States berengah ari 25 Julai nyentuk 2 Ogos tu tadi.
“Taja pan kami semina nganjung empat iku atlet ari Sarawak nyereta kontijen Malaysia Special Olympics, tang kitai mujur teulihka dua ari enam midul emas, dua ari lapan midul pirak sereta tiga midul engkeraju.
“Tu sebengkah pengerami lumba ke besai diatur; bisi 7,000 iku atlet sereta 3,000 raban jurulatih datai ari 177 bengkah menua di serata dunya.
“Aku deka nganjung peminta ngagai Kabinet nengeri ngambi nyediaka insentif peransang ngagai raban nembiak kami ke udah ngasuh nama Malaysia enggau Sarawak pegari.
“Kami ngarapka perintah nengeri meri pemendar ngagai keretas kereja ngungkupka insentif ngagai nembiak kami tu, ke udah ngambi bagi dalam Special Olympics Sarawak lalu sida tu ari Miri, Sibu sereta Kuching, ke udah mujur nyereta Special Olympics World Summer Games di Los Angeles, United States berengkah 25 Julai nyentuk 2 Ogos tu tadi,” ku iya ngenang maya sidang pengarang pengudah bejadika Special Olympics Healthy Project – Family Health Forum di Agape Centre ditu, ensana.
Forum tu diatur raban ari Special Olympics Sibu Chapter enggau Opis Menteri Pengerai, SEGI College sereta Sibu Lions Club ke mega pengatur bekunsi.
Forum tu mega dipelanja raban ari Special Olympics International.
Bela bisi datai ngulu atur pengawa tu, Chairman Special Olympics Sibu Chapter Jason Tai, Kaban Kunsil Nengeri (ADUN) Nangka Dr Annuar, Sekretari Association for Children with Special Needs Sibu Dr Toh Teck Hock.
Fatimah mega madah, sebengkah agi pengawa lumba diberi nama Paralympics deka diatur tang semina di Malaysia aja.
Iya madah, tim Sarawak ngembuan juluk deka nyadi champian dalam lumba Paralympics iya nya 11 kali bejurut.
“Perintah nengeri sebedau tu mega besetuju peminta nyediaka insentif ngagai atlet ke nyereta lumba Paralympics di Perlis.
“Puji tu sebaka enggau iya ke diberi ngagai sekeda raban atlet ambi ke chunto, SUKMA,” ku iya.
Berebak enggau nya, Dr Annuar mega madah, pengawa lumba deka diatur taun tu.
“Iya deka diatur nengah sistem lima-sepiak,” ku iya.
Dr Toh nyelit randau nya, madah, lumba nya deka ngempung raban orang ti nyelai pendiau ke ngembuan pelajar sereta raban sida ke ngembuan pelajar biasa aja.
Iya, udah nya meri perambu ngaga nama lumba nya ‘YB Dr Annuar Challenge Cup’ entara tim main bol sekula.
“Dr Annuar mega udah madahka diri bisi perambu ngagai Special Olympics Sibu Chapter.”
KE PENGINGAT: Athlete spesial, Joseph Chieng nyuaka tepa ngagai Fatimah (empat kiba) seraya dikemataka (ari kiba) Dr Toh, Tai, Dr Annuar sereta ke bukai maya atur pengawa nya.