ANANG LEMBAU: Morshidi (dua ari kiba) nyempulang Adenan nyuaka Surat Tawaran ngagai seiku ari 60 iku pelatih renggat keterubah CENTEXS Kampus Lundu seraya dikemataka Sapit Kepala Menteri Datuk Patinggi Tan Sri Alfred Jabu Numpang (kiba) sereta ke bukai.
LUNDU: Perintah nengeri dalam Langgur Pemansang Malaysia Lumpar Ke-11 (RMK11) bisi perambu numbuhka tiga buah kampus pampang Pusat Kecemerlangan Teknikal Sarawak (CENTEXS), dalam timpuh lima taun ke deka datai.
Sekretari Perintah Nengeri ti mega Chairman CENTEXS Tan Sri Datuk Amar Mohamad Morshidi Abdul Ghani madah, dipelabaka ungkus belanja dikena numbuhka tiga buah kampus nya urung RM500 juta.
“Perintah nengeri deka terus chakah sereta ngenegapka agi pemansang bidang pengelandik teknikal enggau vokasyenal di nengeri tu, lalu ukai semina numbuhka CENTEXS di Kuching aja.
“Perintah nengeri dalam RMK11 udah merambu numbuhka penyampau tiga (3) buah kampus pampang CENTEXS ti dipelabaka ngena ungkus belanja RM500 juta dalam timpuh lima (5) taun ke deka datai.
“Kampus Lundu iya nya pampang CENTEXS ti keterubah. Lalu dua agi pampang nya diperambu ditumbuhka ba kandang menua bukai di Sarawak, nitihka peminta enggau guna.
“Naka ke diatu bisi 60 iku nembiak udah ngerijista nyadi pelatih renggat keterubah CENTEXS Kampus Lundu, ti berengkah 7 September tu,” ku iya.
Morshidi mansutka pekara nya dalam jaku pengelalu maya pengerami nasih tanah projek CENTEXS Kampus Lundu ti diatur ba palan projek nya ditu, ti udah mujur dipenyadika Kepala Menteri Datuk Patinggi Tan Sri Adenan Satem, kemari.
“Perintah nengeri udah ngemendarka CENTEXS ngena bangunan Opis Pelilih Mit Lundu lama nyadi kampus sementara, sepemanjai dalam timpuh nganti kampus ke deka digaga nya tembu taun 2016,” ku Morshidi.
Iya ngarapka enggau penumbuh CENTEXS Kampus Lundu, deka mayuh agi raban nembiak dilatih lalu ari nya ulih nyendiaka lebih mayuh agi pengereja pengawa bepengelandik ungkup SCORE.
Lalu dipelabaka urung 350,000 pengereja pengawa bepengelandik dalam bidang teknikal enggau vokasyenal dikena nyapai nyadi menua maju lebuh maggai taun 2030, ku iya.
Ngenang pasal CENTEXS nya, iya madah, dalam taun 2014 perintah nengeri udah ngemutuska Yayasan Sarawak megai tanggungpengawa bejalaika Pusat Latihan Pembangunan Belia (PLPB) ti bepalan ba Jalai Santubong.
Berengkah ari nya PLPB diberi nama baru iya nya Pusat Kecemerlangan Teknikal (CENTEXS), ti ulih mai transformasyen bidang pengelandik teknikal enggau vokasyenal di nengeri tu.
“Proses meri nama baru tu ukai semina bekaul enggau fizikal tauka infrastruktur tang nyengkaum transformaysen struktur pengurusan enggau pentadbiran CENTEX empu enggau program ti dipejalaika.
Ba pengerami nya kemari atur pengawa Penganugerahan Penajaan PETRONAS ngagai sekula dibaruh Sekolah Amanah enggau kerejsama Yayasan AMIR.
PETRONAS ti melanja milih lima sekula di Lundu iya nya SMK Lundu, SK Siar Campuran, SK Sampadi, SK Stunggang Melayu enggau SK Bumiputera.