KENA MERUAN: Mawan benung nyuaka geran MRP ngagai seiku penerima di Saratok.
SARATOK: Menteri Pemansang Rama, Tan Sri William Mawan Ikom meri jaku tangkan geran ke udah disadung ngagai sesebengkah menua tauka NGO nya dikena ngatur pemansang lalu ukai diempa kediri aja.
Kenu ku iya, geran Projek Mit Pemansang Menua Pesisir (MRP) ke diberi nengah pengari rayat nya patut dikena ngatur pemansang sereta bejalaika bemacham program di rumah panjai enggau tumpuk pendiau.
“Agih MRP nya endang sebengkah ari chara perintah mantu rayat.
“Agih MRP ngagai rayat endang sebengkah pengawa perintah Barisan Nasional (BN) dikena nentuka pengelantang enggau pemaik semua rayat,” ku iya.
Kaban Parlimen Saratok tu madah munyi nya rambau Pengawa Nyuaka Geran Projek Mit Pemansang Menua Pesisir (MRP) Pelilih Saratok bepalan di Dewan Masyarakat Sri Krian, ditu ensana.
Kenu ku Mawan, perintah seruran berundingka projek pemansang ke tau meri penguntung ngagai semua rayat di menua pesisir di selampur nengeri tu.
“Nya alai, tu endang seiti semaya perintah BN ngagai rayat di menua pesisir ngambika sida ngasaika diri seruran dipebasa.
“Perintah bebendar ngemansangka menua pesisir laban nemu palan tu penyungkak penatai pemisi nengeri enggau menua,” ku iya.
Nangkan nya, ku iya kerejasama semua piak dalam komiti patut sepenemu ngiga belanja dikena sida ngatur program lalu anang semina ngarapka bantu ari perintah aja.
“Rayat menua pesisir benasip amat laban perintah seruran berundingka perengkaguna ke diguna peranak rumah panjai.
“Nengah agih geran MPR ke diberi sehari tu, ngarapka bala penerima nemu ngingatka pemanah perintah sereta terus nyukung perintah BN,” ku iya.
Mawan madah, geran ke diberi perintah nya ulih dikena mensia mayuh mutarka sebarang penanggul ke bisi ditapi sida.
Iya madah, ari geran nya sida enda ibuh kelalu lama nunggu bantu alai mutarka penanggul diri.
“Kitai ngarapka genap bantu ke udah diberi nya ulih dikena enggau meruan. Pengawa tu mega mandangka perintah endang bebendar deka mantu rayat enda ngira dini alai sida enggau penemu politik ke disukung sida.
“Pekara ke pemadu beguna ngagai perintah iya nya deka nentuka nasip rayat seruran dijaga sereta ngasaika pemansang sebaka enggau orang bukai,” ku tandu Mawan.
Maya pengawa tu urung 50 buah NGO nyengkaum Komiti Pemansang enggau Pengelikun Genturung Pendiau (JKKK), Gerempung Apai Indai enggau Pengajar (PIBG) ari sekula-sekula di sitak Parlimen Saratok, komiti gerija, masjid enggau surau bela nerima geran MRP.
Sama bisi datai iya nya Kepala Polis Pelilih Saratok, DSP Lee Thai Lein sereta bala ketuai raban bansa ke besemak.