KUCHING: Standard nembiak sekula kitai diatu bejaku English endang ngirauka ati kelebih agi enti kitai beratika prestasi nembiak ngena jaku English sekalika maya berandau tauka nulis.
Menteri Pengintu Pengelantang Mensia Mayuh, Orang Indu enggau Pemansang Ruang Bilik ke mega nguasa pekara pelajar di nengeri tu Datuk Fatimah Abdullah madah, pengelemi ke ditapi nembiak kitai diatu iya iya nya ba Jaku English baka ke dipeda kitai ari pemutus peresa UPSR, PMR (PT3 ) enggau SPM.
“Ari pemutus peresa SPM taun nyin tadi, aku dipadah pemayuh ke enda mujur sereta pemayuh ke mujur.
“Jaku English muntang dipelajar enti kitai rajin bejaku ngena jaku nya sebaka enggau Jaku China, Tamil tauka jaku bukai,” ku Fatimah.
Iya madah munyi nya lebuh bejaku ngarika Kepala Menteri di atur pengawa Aum Pengatur Pelajar Kepala Pengajar Sekula Sekondari Sarawak Ke-50 di Hotel Riverside Majestic ti bela digulu lebih 500 iku prinsipal ari serata Sarawak.
Sama bisi nguluka atur pengawa nya kemari, Menteri Muda Pengelantang Pendiau Robert Lawson Chuat, Menteri Muda Pemansang Tanah Datuk Gramong Juna, Menteri Muda Pengawa Dagang Temuai Datuk Talib Zulilip enggau Direktor Opis Pelajar Sarawak, Rakayah Madon.
Nya alai ku iya, Kepala Pengajar ke mega ketuai dalam sekula enda tau enda nguluka nembiak bejaku ngena Jaku English.
“Ngelingi sereta dalam sekula mega patut bisi disikap ngena pematak pengerindu nembiak belajarka Jaku English, lalu iya patut digaga ngena chara diri. Ari semua kereban ke dipeda nembiak ngujungka sida bisi pengerindu belajar.
“Ambika chunto baka sebuah sekula di menua pesisir, ke nyulut ba renggat dunya, iya nya SK Ulu Lubai. Enti diperatika Jaku English sida, mayuh kitai enda pechaya laban bala nembiak iya chukup landik bejaku English, lalu semua nya berindik ari kreativiti sereta inovasi kepala pengajar sereta pengajar sekula nya,” ku iya.
Taun nyin tadi (2014) ku iya, ari pemayuh nembiak ke ngambi Jaku English maya peresa, manggai urung 33,616, lalu ari penyampau nya ke teulihka ‘cemerlang’ manggai urung 3,790 (ke bulih A+, A tauka A-), ke pas urung 25,832 (76.84%) lalu ke enda mujur urung 7,784 (23.16%).
“Nyadi seiku kepala pegajar ke nyadi ketuai ‘instructional’ di sekula, kitai enda tau enda ngambi atur ke drastik kena beratika nembiak kitai ulih pas dalam Jaku English, ke sama berat baka Bahasa Melayu enggau Sejarah manggai taun 2016.
“KPM udah ngaga mayuh macham strategi, sereta program kena beratika ari sukut kualiti pengajar kitai, sereta Jaku English nyengkaum program enggau strategi, deka ngemanahka pengelandik kitai bejaku English,” ku iya.
Kelimpah ari nya, Fatimah madah dalam Langgur Pemansang Malaysia Lumpar Ke-11 (RMK 11), menua tu deka teulihka nembiak ke bepengelandik manggai 35% enti dibanding enggau kediatu semina 28% aja.
“Bala nembiak kitai jemah ila deka nyadi pengereja pengawa ke bepengelandik, kebuah kitai ngemeratka TVET (Teknikal, Vokasional sereta pengawa latih). Beratika bala nembiak kitai disediaka enggau pelajar TVET.
“Kitai begunaka pengereja pengawa ke belengelandik, kitai begunaka professional, pengereja pengawa teknikal, pengereja pengawa ke nyadi sukung ke bisi pengelandik, kreatif sereta inovatif,” ku iya.
“Kitai agi betapi enggau penemu orang mayuh ba TVET tu pilih kedua, ke agi dikumbai orang pengawa ke penudi iya lebuh enda mujur masuk universiti tauka kolej.
“Kitai ke nyadi pengajar enda tau enda meri penemu ngagai nembiak kitai, apai indai sereta pengajar, iya nya TVET sereta pengelandik bukai berat ba pengawa pengelandik ti bisi disediaka dalam kandang lima taun ti deka datai tu ila,” ku Fatimah.