Sehari tu amat mih apai indai lenyau duit ringgit tang enti anak udah teulihka pemujur jemah penyamai nya pulai ngagai sida baru
SRI AMAN: Pengawa nyengulaka anak nyentuk nyadi nembiak ke mujur endang ukai pekara ke muntang tang begunaka pengeransing ari bala apai indai.
Menteri Muda Pemansang Menua Pesisir enggau Pengawa Berumah, Datuk Francis Harden Hollis madah, terubah iya endang pedis bala apai indai nyengulaka anak sida tang asil iya ulih dipeda nyema bala anak udah teulihka pemujur jemah ila.
“Sehari tu kita patut bebuaika duit ringgit, lelak ngulihka belanja enggau utai bukai dikena nyengulaka anak tang kita empu deka ngasaika asil iya jemah ila.
“Enda ngawa kitai pedis dulu laban kitai empu deka ngasaika asil iya jemah. Bala anak kitai sempama baka pun sawit, meseti suah diberi baja sereta dijaga enggau manah-manah,” ku iya.
Kaban Kunsil Nengeri (ADUN) Simanggang tu madah munyi nya rambau bejadi Pengerami Merarau diatur Gerempung Apai Indai enggau Pengajar (PIBG), Sekula Primari (SK) Kumpang ditu, ensana.
Iya madah, bala apai indai enda patut ngumbai pengawa nyengulaka anak nya sebengkah pekara ke ngenusah tang patut nganggap bala anak nyadika reta dudi hari.
‘Kitai ngarapka bala apai indai muai runding sida ke baka nya lalu patut berunding panjai deka ngemansangka anak sida nyadi orang ke pemadu mujur sereta ulih gawa ke menua tu,” ku iya.
Nangkan nya, Harden mega ngelalau PIBG terus bekerejasama enggau raban sekula ngemansangka pekara pelajar bala nembiak.
“Aum apai indai enggau pengajar patut suah agi diatur ngambika apai indai nemu baka ni pemutus pelajar bala anak diri empu,” ku tandu Harden.
Ba pengerami nya, Harden bisi ngungkupka belanja RM 5,000 ngagai PIBG sekula nya dikena sida bejalaika program sepanjai taun.