KUCHING: Chairman Kelab Penyukung Barisan Nasional (BNBBC) Nengeri, Abdullah Saidol deka nemu kebuah konvoi ngintu Hari Sarawak Merdeka 22 Julai diatur raban ‘Movement Sarawak for Sarawakians’ (S4S).
Ku iya nama kebuah S4S milih ngingat 22 Julai, lapa enda sejarah bukai ke udah mayuh nyadi di nengeri tu?.
“Sejarah ke nyadi di nengeri sereta menua tu mayuh lalu nya nyengkaum pengawa raban ketuai kitai ke dulu ti udah bebendar nentuka kitai teulihka kuasa merintah diri.
“Sekalika sida (S4S) ti rindu bejaku sentang sejarah tu amat patriotik sereta enda ngembuan runding tauka tuju politik,” ku iya lebuh dirandau kemari.
Abdullah ke mega Kaban Kunsil Nengeri (ADUN) Semop ngarap semua anang kelalu pechaya ke raban tu ketegal tebal agi sida tu ngembuan kaul enggau penyakal.
Iya nambah, raban ke ngatur konvoi nya mega raban ke udah suah bejaika nama nengeri tu di menua luar.
“Aku enda kala ninga sida nusui cherita sentang pengawa manah ke udah dikereja raban ketuai kitai ke dulu, ti udah nentuka kitai teulihka kuasa merintah diri.
“Sida mega enda kala nusui cherita ketuai kitai ti udah berambunka nyawa ngelaban keruga munsuh komunis tauka jeman konfrontasi Indonesia,’ ku iya.
Tajapia, Abdullah enda mantah sida ngatur konvoi nya enti pengawa nya diadu enggau likun sereta bisi pemendar ari ejensi ke megai kuasa.
Kitai ngemeranka tusun merintah chara demokrasi ti meri hak ngagai tiap iku pertanak menua mansutka penemu tang semua nya patut dipejalaika enggau basa ti besai lalu ngemeratka sensitiviti semua, tandu iya.
Enti konvoi nya diatur ketegal ti deka ngerachun runding rayat sereta ngeruga penyerakup tiap pupu bansa, Abdullah pechaya komuniti ti rinduka pengelikun enda deka nyukung konvoi sereta pengawa S4S.