Peranak di sitak Engkilili mega dilalau bekempit enggau perintah sereta nyeliahka sebarang petenah
Dikarang Frankie Junau //
ENGKILILI: Kaban Kunsil Nengeri (ADUN) sitak Engkilili Dr Johnical Rayong Ngipa madahka diri nyukung penuh semua aktiviti ti diatur gerija di nengeri tu.
Pekara tu, ku iya, nyengkaum aktiviti diatur paderi enggau layleader dalam ngenegapka pengawa gerija ba sesebengkah endur.
“Aku besemaya deka bejalaika pengawa ti manah sereta nyukung tiap aktiviti diatur paderi enggau layleader lebih agi di konstituensi Engkilili laban sida tu mai taunggungpengawa sereta jaku Tuhan,” ku iya.
Iya mansutka jaku nya rambau Pengerami Genap Taun Ke-6 Serakup Layreader sereta Ngiling Bidai Gawai 2015 di Dewan Gereja St Michael, Engkilili malam.
Ku iya layleader ulih nyadi pengari paderi dalam sesebengkah pengawa pengarap baka di rumah panjai, nya alai pengawa ti dikembuan sida tu chukup besai reti sereta iya bebendar nyukung tiap aktiviti diatur sida.
Udah nya iya mega nesau semua rayat lebih agi pengundi di DUN Engkilili ngambika seruran begulai enggau Barisan Nasional (BN) ti chukup nemu sereta ngemeratka peminta enggau peneka rayat di nengeri tu.
“Anang sesekali ngenyauhka diri ari perintah ke diatu laban iya chukup siru ke rayat sereta anang mendingka jaku selebubu ngapa sekeda piak laban sida nya ngembuan entelah ti dilalaika,” ku iya.
Ku iya, pengundi dia enda ibuh nitihka pengawa ti dikereja sekeda orang ke benung aktif ngelakuka diri madahka deka nyadi chalun baru di DUN Engkilili laban iya mengkang chalun di baruh menira BN.
Sebengkah berita ti manah ngagai peranak di konstituensi nya iya nya Kepala Menteri Datuk Patinggi Tan Sri Adenan Satem deka bejalai nemuai ngagai Engkilili kena 29 July seraya betemu enggau peranak menua nya.
“Enti sema aku enggau Parti Rakyat Bersatu (UPP) ukai sebagi ari BN, kati tau Kepala Menteri nyanggup diri datai nemuai kitu,” ku iya seraya nulak dawa ti ngumbai iya enggau UPP ukai sebagi ari BN ba renggat nengeri tauka di perintah besai.
Tambah mega, iya bisi disediaka agih belanja penyampau RM8 juta ngambika diagihka ngagai rakyat di sitak nya sereta nya nerangka iya di piak perintah.
Nyempulang pengerami nya mega, Dr Rayong ngemendarka pengawa meri geran penyampau RM8,000 ngagai Serakup Layreader Gereja St Michael Engkilili nyadika belanja dikena sida bejalaika aktiviti semanjai taun.
Bela bisi datai ngulu pengerami nya, Revd.
Stephen Ngabong, raban kaunsilor sereta raban ketuai rumah ngelingi Engkilili enggau Skrang.