(Gambar Pengias) Tugung uras ke ulih endur chit, gerinang, nyamuk sereta lalat diau, kelalu tau ngeruga pengerai mensia mayuh.
KUCHING: Taja pan dikelala nyadi sebuah mengeri pemadu beresi di menua tu, tang ketegal ulah sekeda orang ti bebuaika uras sebarang endur, ngujungka Kuching agi betapi penanggul pemeresi.
Muai uras sekalika ba kandang endur mensia mayuh tauka kandang endur diri, nya sebengkah ari penyalah di nengeri tu.
Dikena nemu gaya ulah peranak mengeri bebuaika uras ti enda ngira alai, Trienekens (Sarawak) Sdn Bhd begulai enggau Dewan Bandaraya Kuching Utara (DBKU) dalam taun 2009 dibaruh Kumpulan Alam Sekitar udah bejalaika tinjau di mengeri tu.
Nya projek Lokal Agenda 21, besaup bejalaika pengawa ninjau dikena nentuka tikas ulah bebuaika uras ba kandang endur Segitiga Emas di mengeri tu.
Nengah bantu seraban pemeresi jalai, uras mujur digumpul ari lima zon nyengkaum kandang endur baka Jalai Gambier, Green Hill, sepemanjai Tebiang Ai Kuching enggau Jalai Padungan.
Asil pansik ti dipejuraika DBKU ba sebengkah Seminar ‘Pengurusan Sisa Pepejal’ ke diatur Sarawak Waste Managemenat (SWM), Trienekens enggau Universiti Malaysia Sarawak (UNIMAS) dalam taun 2010 ngayanka mayuh macham uras ti pemadu mayuh dibuai ba kandang endur nya baka papung insap lalu ditangkanka keretas, plastik, barang organik, kacha, aluminium enggau ke bukai.
“Kelimpah ari ngayanka bansa uras, pansik nya mega nunjukka ulah peranak mengeri tu ti bebuaika uras.
“Tetiap iti zon ti disebut nya tadi bisi disediaka tung uras, tang agi mayuh ke milih chara muntang iya nya muai uras sida ba atas jalai alun.
“Penerang ti baka tu beguna amat sereta nyadika lalau raban ke bekaul merambu nama ke patut dipejalaika sereta dikena ngangkatka pemanah program antisampah ke udah bisi,” nitihku sebengkah penerang ti diberi ngagai Utusan Borneo.
Nambahka nya runding ti nganggap pengawa nyapu uras tanggungpengawa pemeresi jalai tauka raban penerit adat aja, nya sebengkah ari kebuah penanggul bebuaika uras sepeneka ati agi nyadi.
Runding ti baka nya deka ngujungka ulah bebuaika uras enda betul lalu meri pangka negatif ti ukai semina ngagai rampa menua enggau pemanah rampa menua tang nyengkaum pengerai mensia mayuh.
Ulah ti baka tu majak nyadi lebuh palan muai uras ti enda dikemendar dibuka sereta majak nyadi ba kandang mengeri enggau menua pesisir iya nya uras dibuai ba endur ke jauh enda dipeda orang, tauka rumah ti enda tembu digaga.
“Di Kuching enggau endur bukai, palan endur muai uras ti enda dikemendarka nya semak enggau tung uras ti udah disediaka.
“Palan endur muai uras ti nadai pemendar ukai semina ngerusak pemanah rampa menua tang mega meri pangka ngagai pengidup mensia ke ngelinggi laban chit, nyamuk, lalat enggau ke bukai datai ngagai endur nya, tu ke mai penyakit (leptospirosis enggau denggi) kelebih agi enti bisi laluh pemakai,” ku penerang nya.
Kelimpah ari nya, sungai, pegung, tasik tauka tekad ai mega endur bebuaika uras ke tau ngeruga pemeresi kelebih agi enti utai ke dibuai nya ulih ngeruga pengerai.
Mayuh orang agi bedau beratika pemesai guna nyaga pengelikun seraya nyaga pemeresi endur diau tauka endur gawa ti deka mai penanggul ketegal chara bebuaika uras ti enda dikemerat.
Taja pia, semua pekara nya ukai semina begunaka ulah enggau chara positif mensia mayuh tang mega begunaka kerejasama semua ba pengawa nyaga pemeresi, awakka pengerai mensia mayuh sama tejaga.
Nyaga pemeresi endang tanggungpengawa ti patut dipekunsi lalu kitai ti nyadi raban bansa,patut ulih ngemeranka tanggungpengawa nyadi peranak enggau pengereja pengawa mengeri awakka ulih ngasaika pengerai enggau pemeresi.
Ba Trienekens, kerejasama ke manah ba semua ti bekaul endang pekara ti beguna dikena nyaga pemeresi, berengkah ari pun nyentuk ngagai pengawa munaska uras nya.
“Tiap pengawa taja pan mit, kitai ulih mai ubah besai ngagai rampa menua enggau pengerai kitai.
“Nya alai aram mih kitai sama nyadika pemeresi sebengkah ari pengawa ti dikemeran sereta dikemeratka kitai ninting hari, laban enti ngemeratka pemeresi, pengawa muai uras ba sebarang endur ti enda dikemendar enda nyadi agi,” ku penerang nya.