Berindik ari nya pemayar chukai ba opis kaunsil di nengeri tu deka ngasai tating belanja dikelempung
Dikarang Chris Bishop //
KUCHING: Opis Kaunsil Kandang Bandar Padawan (MPP) ngelaluka pemutus Kepala Menteri (KM) Datuk Patinggi Tan Sri Adenan Satem ti netap rayat nengeri tu diseliah mayar Chukai Barang enggau Servis (GST) ba semua kaunter ke disedia opis kaunsil.
Chairman MPP Lo Khere Chiang madah, enggau pemutus nya Perintah Nengeri deka nyaup nyeliahka pemayar chukai mayar GST ungkup servis ke disedia opis kaunsil tauka perintah.
“Pemutus tu dikearap ulih ngurangka tating belanja ke ditapi pemayar chukai sereta mulaika pemaik ungkup semua rayat nengeri tu.
“Kitai ulih nyimpul penemu ke alai, tusun perintah ti betuaika Adenan kenyau hari keterubah iya mangku pengawa nyadi Kepala Menteri nyentuk diatu endang seruran ngemeratka pemaik rayat.
“Semua pemutus nyengkaum pengawa ke dikereja Adenan endang ungkup pemaik rayat enggau nengeri tu,” ku Lo.
Iya mansutka jaku tu ba sebengkah aum pengarang berita pengudah nyadi chairman aum ninting bulan MPP ditu, kemari.
Lo nambah, Kepala Menteri nadai ngembuan runding ti deka ngemediska rayat lalu iya nguna semua pengeraja asal ti dikemisi nengeri tu ungkup pengelantang rayat.
Ku iya dalam timpuh setaun Adenan udah ngetuka bayar tol di Jematan Lanang Sibu, ngurangka tarif lekterik di nengeri tu sereta pekara bukai.
“Berindik ari nya, peranak Sarawak patut meri sukung ke nadai bebagi ngagai Adenan.
“Perundingka nama agi pekara manah ke ulih dibai iya (Adenan) dalam timpuh lima taun ti deka datai enti dalam setaun aja iya udah mai mayuh pengelantang sereta ubah ba kitai,” ku Lo nandu.
Adenan, kena Hari Enam tu tadi rambau bejadika pengawa ngetuka bayar tol Jematan Lanang Sibu mansutka pemutus, semua bayar GST ke disediaka semua opis kaunsil deka ditanggung perintah nengeri magang.
Ngenang kaul bukai, Lo madah, MPP dalam timpuh ke semak deka nyikap tiang api jalai ba kandang endur ke bedau bisi perengka nya.
Ku iya pengawa nya dipejalai pengudah perintah ngemendarka MPP nguna duit simpan ejensi nya ba penyampau RM1 juta.
“Duit tu ukai pemeri ari perintah nengeri tauka perintah besai tang duit simpan MPP ngelamatu. Kitai nguna duit simpan tu ungkup pengelantang rayat,” ku iya.
Taja pia Lo madah, pemyampau semua ke diguna ungkup pengawa nyendia tiang api dalam kandang endur ke dikuasa MPP manggai RM3 juta.
Nengah RM1 juta tu kitai deka nyendia tiang api ba kandang endur ke patut disediaka dulu, tandu iya.
Ba aum pengarang berita nya mega Lo bisi mandangka trofi champian ke MPP rambau Regatta Sejijak bedau lama tu tadi.
Ba regatta nya, tim MPP nyadi champian bagi pekit ejensi perintah.