KANOWIT: Raban profesional Dayak dikearapka anang kelalu ngutuk tauka ngemansutka jaku ke nadai belebas laban nya ulih ngemaruhka pengari rayat Dayak empu.
Menteri Pemansang Tanah Sarawak Datuk Amar Tan Sri Dr James Masing madah, taja pia iya tetap bebasaka genap jaku bantah nya.
Manah agi enti semua semua jaku bantah nya digaga enggau chara alus, ba palan ke betul sereta nitihka maya ti patut.
Kenu ku Masing, enti jaku bantah tauka kutuk nya ditempa betingkah lalu digaga enggau chara ke enda patut sereta ngembuan juluk ke enda manah, iya deka ngerugi perintah.
“Ari sukut kitai ke nyadi pengari rayat, iya ukai pengawa muntang kelebih agi lebuh ngeringka hak enggau pengelantang rayat ke diarika kitai.”
“Nya alai, jaku bantah nya patut digaga enggau belebas ngambika enda ngemalu orang bukai tauka ngerugi bansa Dayak empu,” ku iya.
Iya madah munyi nya rambau bejadi Pengerami Mantar Gawai 2015, diatur Opis Kaunsil Pelilih Kanowit begulai enggau JKKK Rh Daniel di Sungai Bawan ditu, ensana.
Sama bisi datai Kaban Parlimen Kanowit Datuk Aaron Ago Dagang enggau Kaban Kunsil Nengeri (ADUN) Ngemah Alexander Vincent.
Kenu ku Masing, tebal agi jaku bantah ke dibantai nya nengah media sosial ari sida ke nyukung penyakal.
“Nya alai, beserimbai enggau pengerami Hari Gawai Dayak umbas meh ngutuk mantaika jaku ke ulih ngemaruhka orang bukai kelebih agi bansa diri.
“Enti deka bekunsika penemu aku ulih nerima kelebi agi nyema iya mai penguntung ngagai bansa kitai (Dayak),” ku iya.
Presiden Parti Rakyat Sarawak (PRS) tu mega madahka parti nya agi mengkang ngetanka Alexander Vincent nyadi chalun ngarika Barisan Nasional (BN) di sitak DUN Ngemah.
“ Kitai (PRS) nadai mayuh ubah ba rintai nama chalun ke deka bediri napi Pengawa Bepilih Kunsil Nengeri ke deka datai,” ku iya.