KUCHING: Serakup Gerempung Indu Sarawak (PPWS) patut beratika indai orang ba pengawa ngemansang sereta ngenegapka penemu orang indu di menua tu, seraya mantu perintah ngena pengelandik ngemansangka menua.
Menteri ba Opis Menteri Besai Nancy Shukri madah, konsep ‘womenomics’ ti udah dikemeran di menua Jepun udah nyaup nambahka Pemansut Kasar Dalam Menua (KDNK)’ manggai ba 15 peratus.
“Menua kitai bisi urung 9.83 juta iku orang indu ke berumur entara 15 nyentuk 64 taun lalu ari penyampau nya, 4.72 juta (48 peratus) sida nya gawa di luar rumah lalu sebagi besai ari nya 3.04 juta gawa di rumah.
“Ari penyampau 3.04 juta, sebagi besai sida tu indai orang ke betapi enggau penusah enda ulih pansut gawa laban nadai orang ngibun anak sereta ngemataka diri sebilik,” ku iya madah lebuh bejaku ba atur pengawa Aum Pengari Sesi 2015-2018 ditu, kemari.
Sama bisi ngulu atur pengawa nya kemari, Menteri Pengelantang Pendiau, Orang Indu enggau Pemansang Ruang Sebilik, Datuk Fatimah Abdullah enggau Chairperson PPWS Aishah Edris.
Bekaul enggau pekara nya, Nancy madahka PPWS deka meri kelala ngagai sebengkah program baru ke tau digaga konsep ‘womenomics’ dikena di Sarawak, iya nya ‘1 Sitak’, 1 Produk’ nengah industri kotej PPWS enggau Koperwanis nengah bekerejasama entara PPWS enggau Mardi, MPC sereta Unit Pemansang Orang Dagang Bumiputera.
“Tu mega ulih ngemujurka ‘Program 1Malaysia Support For Housewives’ ti diberi kelala dalam taun 2012 kena mantu indai orang ngulihka penatai pemisi ari rumah ngena teknologi online, lalu ulih nempa menua Malaysia nyadi sebuah menua ke meri peluang ngagai orang indu nengah konsep ‘womenomics’.
Berindik ari nya, iya muji pengawa PPWS ti numbuhka Kelab Rakan PPWS nengah kerejasama enggau sekula di Sarawak kena matak bala nembiak sekula ke berumur 15 taun ke atas lalu ngelatih sida iya nyadi tuai pemesai nembiak kelas keterubah.
Dulu ari nya, dalam jaku chairperson PPWS, Aishah madahka PPWS pun taun tu tadi bisi meri kelala ‘Friends of WI’ ke nyadi chara baru ngenegap sereta ngangkatka raban indu Sarawak ti diau di Semenanjung Malaysia.
Iya madah, pengawa tu nyaup matak nembiak masuk gerempung sereta ngaga kerejasama ke strategik dalam pengawa tu baka ngelatih mudal mensia ke seruran deka nyingkang enggau pemansang di menua tu.
“Nya alai, aku ngelalau raban PPWS bekunsika penemu ke dikembuan sida, ti ulih meri penguntung ngagai indu Sarawak.
Beserimbai enggau Aum Pengari Tiga Taun Sekali PPWS Sesi 2015-2018 ti diatur ngelama empat hari ditu, mayuh macham program bisi dipejalaika nyengkaum nemuai ngagai Rumah Anak Mit Kuching, sesi interaktif bekaul enggau pengawa mungkus sereta ngaga label ari Mardi, mandangka chara nguna barang ti tau dikena baru sereta nemuai ngagai sekeda raban serakup seumur idup PPWS.