KUCHING: Hope Place (Gerempung Pengintu Pengelantang Pendiau Harapan Kuching) ngembuan tanggungpengawa ti siru ke raban indai tunggal sereta ruang bilik ke ditating penyuntuk dalam pengidup.
Sebengkah cherita ti balat ngenyinuka ati ke nyadi ba Jenifer Ak Diggil. Pengimun indu bansa Iban tu diatu nupi empat iku anak sereta anak ke biak endar beumur tiga bulan.
Nadai laki endur bepanggai, iya beridup begulai enggau apai indai ke mega idup seranta. Iya enda ulih kereja bekuli ketegal anak mit iya agi mekang ditinggal sereta jam mayuh agi dikena nyaga anak iya nya.
Apai indu tu mega nyadi kuli kereja kunterik taja pan umur iya udah manggai 61 taun kena nyaup begigaka belanja sida menyanak. Naka ke diatu Hope Place udah meri bantu lampin enggau barang pemakai ngagai sida sebilik.
Sebengkah bantu ari Hope Place iya nya Jeba Ak Diggil, menyadi Jenifer Ak Diggil. Nadai penatai pemisi ke meruan, Jeba mega diau nyemilik apai indai iya begulai enggau empat iku anak iya sereta ke pemadu biak beumur tiga taun.
Sida sebilik diau di sebuah rumah mit sereta dinding kayu rumah nya udah tekupak. Lantai rumah nya digaga ari papan sereta dianchauka tikai plastik ke betampal ketegal udah retai. Jeba sebilik berasai gaga ati sereta meri terima kasih ngagai penengkebang Hope Place tu, Kelvin Wan.
“Kami ulih ngasaika pemerinsa sereta penyeranta ke ditapi orang biak tu ke tau dipeda ari gaya pendiau pengidup anak sida,” ku Wan.
Hope Place bejalaika tanggungpengawa bekaul enggau perengkaguna raban indai tunggal.
Hope Place bejalaika pengawa mantu raban orang di pelilih Kuching nyadung barang pemakai enggau perengkaguna ke dikemerat ninting hari.
Hope Place tu sebengkah serakup ukai dikuasa perintah ke suah datai ngelawa sereta meri bantu ngagai raban orang ke seranta enggau orang ti enda benasit diberi bantu barang pemakai baka beras, minyak makai, gula, garam, ruti enggau mi. Mayuh ruang bilik tauka orang kekediri bulih bantu ckukup ungkup sebulan, kelimpah ari nya, bantu bukai mega bisi diberi ngagai sida.
Berebak enggau nya, ngagai ruang bilik ke ngembuan anak mit ke beguna perengka nyemaka orang tuai, baka susu tepung enggau lampin mega bisi diberi.
Hope Place ngenataika bantu sida dalam dua bulan sekali ketegal mayuh rintai nama raban orang deka diberi bantu. Naka ke diatu lebih ari 100 ruang bilik nerima bantu ari sida.
Enti deka nemu pekara tu enggau silik agi sereta chara baka ni meri bantu tau betelefon ngagai Hope Place ba lumur 013-5672775 ari pukul 9.00 pagi ngagai pukul 12.00 tengah malam ninting Hari Satu nyentuk Hari Lima.
Barang sapa ari raban mensia ke nelap ati meri bantu, sida patut minta resit ari staf di Palce Hope.