Dikarang Jacqueline David //
BAU: Kaban Kunsil Nengeri (ADUN) Tasik Biru Datuk Peter Nansian muji pemereti ati Kepala Menteri Datuk Patinggi Tan Sri Adenan Satem ke terit enggau atur enda ngemendarka sebarang penemu eksterim pengarap dibai tama ngagai nengeri Sarawak.
Iya madah, di Malaysia, kitai beterima kasih, laban kitai dikemendarka megai barang pengarap nitihka peneka diri di Malaysia.
“Di Sarawak, Kepala Menteri udah madahka nagang sebarang penemu eksterim ba pengarap, dibai tama ngagai Sarawak, lalu ngachau pengelikun menua sereta rayat menua tu.
“Di Sarawak, Kepala Menteri madah kitai tau ngangau Tuhan kitai peneka ati, baik nya Tuhan aja, Bapa, Allah…Barang ku pegarap kitai laban kitai tau ngena leka jaku Allah Ta’ala. Nadai penanggul pasal leka jaku Allah ditu, laban kitai tau ngena jaku nya,” ku Nansian.
Iya madah munyi nya lebuh dirandau raban pemberita, pengudah bejadika atur pengawa Nyuaka Geran Perintah ngagai Gerija-gerija di Pelilih Menua Bau (sitak Tasik Biru) di Dewan Louis Gerija St Stephen semak ditu, kemari.
Gerija tauka Chapel ke nerima geran RM646,000 Perintah nya, St Andrew Kiri Bokak, St John Singai, St Peter Srippau, St James Bitikie, St Leonard Atas, St Michael Sudoh, St Henry Apar, St Martin Segong, St Mathew Sibuluh, St Paul Miki Nowang, St Agnes Tsaou Grogo, St Mary Suba Bau, St Lawrence Ruiz Suba Buan, St Stephen Bau, St Thomas Skiat Baru, St Barnabas Skiat Lama, St Mark Staas, St Philip Skibang, St Auggustine Sebobog, St Leo Serasot, SIB Kpg Serasot, St Mary Bogag, St Lucas Duyoh, St Francis Xavier enggau CMC Singai.
Nansian ti mega nyadi Menteri Muda Pemansang Raban Bansa nandu, pan-pan ke ‘House of Worship’ nya datai ari Perintah, alai ungkup RM800,000 diberi, lalu ukai semina meri ngagai gerija aja, tang nyengkaum tepikong (deka diberi kena 8 Mei tu ila), surau tauka masjid (udah diberi) di sitak Tasik Biru.
“Aku meri nyengkaum semua pupu bansa sereta pengarap, tang laban Bau tu pemayuh rayat ditu tebal agi ke bepengara Keristin Katolik, tentu meh ungkup sida iya mayuh agi. Taja pia, ungkup tauka pan nya diberi nitihka pemerat sesebuah ‘House of Worship’, baik nya ngaga baru, tauka semina deka ngemanahka aja,” ku iya.
Kelimpah ari nya, Nansian nandu, dalam pendiau kitai, bisi tiga pemerat pemansang, iya nya tubuh, runding, nyengkaum semengat.
“Kitai patut mantu sukut semengat laban sukut tu berat ba mensia. Nya alai, enti kitai diau enggau pendiau ke bisi pengarap kitai nyadi orang ke maju, ke tau sama mantu ngemansangka menua.
“Menua kitai pan likun sereta ulih besaup enggau pangan diri kelimpah ari begulai enggau pangan diri enggau likun. Ni naka berekat ke udah diberi Tuhan, kitai bekunsi enggau pangan diri,” ku iya.