KUCHING: Parti Tindakan Demokratik (DAP) enda setuju enggau pemutus ngemendarka ungkup belanja RM500 juta ti dikena ngenyampatka projek pemansang di menua pesisir,lalu nya ngayanka penyakal enda nyukung pemansang di menua pesisir.
Pekara tu dipadahka Sekretari Besai Barisan Nasional Negeri, Datuk Dr. Stephen Rundi Utom sereta disukung raban pengari rayat Barisan Nasional (BN) ari menua pesisir ke bukai.
Iya madahka penerang sereta penemu DAP ti enda setuju enggau ungkup belanja nya (RM500 juta), enda setipak enggau Impian Sarawak ti suah dipanjungka parti nya.
“Kami ti ngarika sitak menua pesisir endang amat ngarapka pemansang menua pesisir dipejalaika enggau jampat lalu pekara tauka langgur kami nya disukung YAB Kepala Menteri ti ngungkupka belanja RM500 juta (dikena ngenyampatka pemansang menua pesisir).
“Taja pia sida DAP enda setuju ungkup belanja nya dikemendarka, ari tu kitai ulih meda sida enda ngasuh kitai di menua pesisir dikemansangka enggau jampat.
“Sida DAP enda nyukung pemansang menua pesisir. Enda setipak enggau Impian Sarawak ti suah disebut tauka Impian Sarawak nya semina politik aja tauka gimik sida aja ?,” ku iya.
Dr. Rundi ti mega ADUN Kemena meri penemu tu ba aum pengarang berita ti diatur ba Bilik Media, Dewan Kunsil Nengeri ditu, pagi kemari.
Taja pia, iya madahka pengari rayat BN deka ngenukuka pemansang menua pesisir ulih dipejalaika enggau lengkas ngambika peranak di kandang menua pesisir ulih ngasaika pengelantang ke sebaka enggau peranak di mengari.
“Nya alai ditu kami ngingatka peranak menua pesisir ngambika enda mudah dikelikuh tauka dipelitik penyakal ke lebih agi DAP.
Nyempulang Dr. Rundi dalam aum pengarang berita kemari, Datuk Dr. Julaihi Narawi (BN – Sebuyau), Liwan Lagang (BN-Belaga) Robert Lawson Chuat (BN- Bukit Saban) enggau ke bukai.