MIRI: Raban bansa Bisaya dilalau terus beserakup enggau pangan diri ngambika sida ulih nyingkang maju seriris enggau bansa bukai di nengeri tu.
Kaban Kunsil Nengeri (ADUN) Batu Danau, Paulus Palu Gumbang madah, penyerakup tu beguna amat ngambika semua program pemansang ke benung dipejalaika tau mujur.
“Aku ngarapka, raban bansa ke mimit baka Bisaya dipelabaka urung 10,000 iku di nengeri tu ke tebal agi nguan menua Limbang terus beserakup nyukung agenda pemansang,” ku iya rambau bejadi Aum Besai Dua Taun Sekali (BGM) Gerempung Bisaya Sarawak (PBS) di Limbang, empai lama ke udah.
Paulus ke mega nyadi penyanding penemu PBS ba penegrami nya madahka diri deka ngungkupka geran RM100,000 ngagai Palan Main Asal PBS, RM50,000 dikena ngaga begunan PBS enggau RM30,000 dikena ngatur Pesta Babulang kena 5 nyentuk 7 Jun taun tu.
Nangkan nya, BGM ke sekali tu ngemataka semua penuduk exco dipilih baru laban nadai dipekitka iya nya Temenggong Wilfred Yusin Bunjok (Penyanding Penemu), Nicholas Boyok Pura (Penyanding Penemu enggau Pengari), Antonio Kahti Galis (Presiden), Latip Sapong (Sapit Presiden), Peter Sawal, Helimah Muda enggau Narawi Aba (bela nyadi Mandal Presiden I, Naib Presiden III), Gumbang Pura (Sekretari Jeneral), Munan Bindok, Henry Madai enggau Marcella Lily Sapun (bela nyadi Penulung Sekretari Jeneral I, II enggau II), Matius Mujar Apong (Tukang Wang) enggau Jitar Nawai (Penulung Tukang Wang).
Antonio ba jaku iya ngarapka PBS ba semua renggat enggau pampang terus bekerejasama ngemujurka aktiviti ngambika tau meri penguntung ngagai kaban gerempung.