Projek Jalai Pan Borneo patut diberi ngagai kunteriktor ti bisi pengelandik ngambika pengawa nya tembu menyana
MIRI: Opis Menteri Kereja Raya Malaysia (KKR) begunaka sukung kunteriktor ke bisi pengulih bejalaika projek Jalai Besai Pan Borneo Sarawak.
Renggat keterubah projek beungkus RM13 bilion lalu udah dipenyadi Menteri Besai, Datuk Seri Najib Razak ke nyengkaum pengawa ngaga jalai 919 kilometer (km) ari Tanjung Datu ke Merapok.
Menteri Kereja Raya, Dato Sri Fadillah Yusof madah, opis menteri begunaka mayuh agi kunteriktor ke mayuh peneba pasal jalai raya ngemujur Pan Borneo nengah chara bekerejasama enggau Kaunsil Dagang Bumiputera Sarawak (DUBS) sereta Kaunsil Dagang enggau Industri Dayak (DCCI).
“Perintah udah ngaga pemutus Pan Borneo deka dipejalaika nengah program ‘Public Private Partnership’ lalu sebagi ari ungkus belanja nya deka dipelanja kompeni konsesyen.
Lalu peluang ngagai nengeri Sarawak iya nya ari Tanjong Datu nyentuk ke Merapok di Lawas enggau penyampau ungkus kunterik keterubah dipelabaka RM13.5billion
Enti kitai bulih satu peratus (penyampau kunterik), nyadi (1 peratus) nya ambis nadai lebih RM100 juta. Perundingka kita 1 peratus dibagi ngagai kunteriktor kelas F.
Nya alai, kitai meseti nambahka pengelandik, awakka ulih ngerebut peluang ke udah ayan ba mua,” ku iya.
Iya madah munyi nya rambau pengerami makai malam begulai enggau kaban Nembiak Parti Pesaka Bumiputera Bersatu (PBB) nyerumba pekit main bol Trofi Ketuai Nembiak PBB di sebengkah hotel ditu, malam ensana.
Iya madah, bisi 30,000 kompeni kunteriktor kelas F dirijista ba serata menua tang semina 28,000 kompeni dikelala chakah.
Lebih 2000 kunteriktor nadai chakah diguna kunteriktor besai ke semina duduk lantang ati nganti bayar 10 peratus ari projek ke diberi.
“Kitai enggai meda penanggul baka tu agi. Kitai deka munaska penemu Ali Baba. Kitai deka meda kunteriktor tulen. Orang ke nyengala nyadi pedagang, enti nitihka ngaduka projek diri empu nengah chara nentuka sab kunterikor bejalaika pengawa enggau meruan,” ku Fadillah.
Entara pengawa baru KKR iya nya meransang raban nembiak ngambi kus pengelandik awakka sida ulih nyadi kunteritor pakar.
Sida diguna KKR dalam bejalaika pengawa ngemanahka rumah enggau kuarters polis enggau soldadu ke bisi dipejalaika sepanjai taun tu enggau taun nyin ila.
Iya madah, projek dibagi nitihka pengelandik ke dipenggi konpeni kunterikor baka pakar ngaga paip, pelancha, elekterik enggau elektronik.
Pengawa tu deka lebih dikemerat ngagai kunteriktor ke bisi pengelandik sereta udah nyereta kus ba palan pengelandik baka GIATMARA, Institut Kemahiran Belia Negara, Akademi Binaan Malaysia, Institut Latihan Perindustrian sereta kala nyereta kus ari Lembaga Pembangunan Industri Pembinaan (CIDB).
“Nengah pengawa ke bisi kualiti, penguna tentu berasai puas ati laban kitai nerima bayar ke setipak. Tu mega nyungkak penatai pemisi rayat nengah pengawa raban pekereja ke landik,” ku iya.