KELAI SUKUNG KAMI: TR Richard (dua kanan) nyuaka pom peminta masuk nyadi kaban TERAS ngagai Kr. Tikong (empat kiba) seraya dikemataka Mawan (dua kiba) enggau sida bukai.
Rayat enda kakang nyukung berindik ari penegap penuduk pemesai parti nya dalam kabinet perintah nengeri
JULAU: Parti Tenaga Rakyat Sarawak (TERAS) majak nerima pom peminta masuk nyadi kaban, berindik ari penemu ti enda kakang sereta arapka penegap penuduk parti nya dalam gempung Barisan Nasional (BN).
Maya sebengkah atur pengawa (Membara) di Rh Lunggek Radin, Nanga Bilat ditu kena Hari Enam, tu tadi, bisi 3,210 iti pom peminta ari enam sitak pengawa bepilih disua ngagai presiden TERAS, Tan Sri William Mawan Ikom.
Kelimpah ari nya, bisi 286 iti pom peminta masuk nyadi kaban ari kandang menua Nam Kiew disua ngagai presiden parti nya.
Tuai rumah ari enam buah rumah panjai di genturung pendiau dia madah, sida tunggang ati masuk sereta nyukung TERAS laban pechaya parti nya endang sebagi ari gempung BN.
“Mawan, presiden TERAS ke mega seiku menteri kanan dalam portfolio kabinet BN nengeri mega kaban parlimen sitak Saratok ngenegapka agi penemu penyukung parti nya. Kelimpah ari nya, Datuk Peter Nansian, Datuk Sylvester Entrie enggau Rosey Yunus sebaris ari ketuai parti ke ngembuan pangku pengawa nyadi sapit menteri dalam kabinet menteri Sarawak. Baka nya mega, Kaban Kunsil Nengeri Batu Danau, Paulus Palu Gumbang ke mangku pengawa nyadi chairman penyangkai kapal Miri, ngenegapka penuduk parti nya dalam perintah nengeri,” ku sida.
Berebak enggau nya, semua ketuai ti nyadi menteri tauka YB dalam TERAS sebaka enggau pengari rayat bukai, bela diberi kuasa nyua sereta ngenataika bantu projek ngagai peranak menua di sitak ke dipegai sida.
Lebuh nyeliah sekeda penemu ti ngumbai Mawan pengari parlimen ti disebut penyakal ba renggat perintah besai, ku sida, naka ke ditemu, maya pengawa bepilih parlimen suba, Saratok sebagi ari penuduk BN ti ditemu kering ngalahka kah penyakal. Berindik ari nya mega, sitak ke dipegai presiden TERAS nya udah mayuh ngasaika pemansang pengudah iya megai kerusi nya.
Bela bisi nyuaka pom peminta masuk nyadi kaban TERAS iya nya, TR Ali ari Entabai , Endawie Entinggi ari Julau, Munsol Gan (Nangga Dong), Eddy Jeman (Nangga Kelangas), Seman Panting (Ulu Lasi) enggau TR Lunggek.
Nengah penegap ti dikembuan TERAS diatu, semua tuai rumah ke bisi datai maya atur pengawa nya ngarapka sitak Meluan ke dipegai Wong Judat ari Sarawak Workers Party (SWP) ulih diarika parti ti diketuaika Mawan.
“Kami bisi tanggungpengawa diri ngeringka TERAS lalu minta presiden parti milih sapa ke patut bediri ba sitak nya (Meluan) ngarika BN maya pengawa bepilih nengeri (PRN) tu ila,” ku sida.
Sida ngarapka Mawan ulih tetemuka seiku pengari ti dikearapka semua peranak menua dia bediri ngarika TERAS maya PRN ti deka datai tu.
Berindik ari peneka sereta pinta peranak menua dia, Mawan besemaya deka betemu enggau ketuai BN nengeri berundingka pekara nya enggau nenak agi.
“Taja pia, semua pemutus ba perambu ke disebut nya, dilempai ngagai Kepala Menteri (KM) Datuk Patinggi Tan Sri Adenan Satem ke nyadi chairman BN nengeri ngaga pemutus,” ku Mawan.
Indah Menteri Besai Datuk Seri Najib Tun Razak arapka Adenan ulih ngiring sereta ngaga pemutus ti engkeman ba pekara politik nengeri Sarawak, tandu iya.