BETONG: Raban pekebun mit diperansang nanam paling nadai dua bansa komoditi dikena sida beridup, awakka nyema seiti nadai beregai agi bisi seiti komoditi endur bepanggai.
Menteri Kebun Dandang Besai enggau Komoditi, Datuk Amar Douglas Uggah Embas madah, opis menteri iya deka nentuka genap perambu dikemujur sereta berundingka chara mantu raban pekebun mit.
“Kami meri sabdidi ngagai pekebun komoditi kelapa sawit, lada, getah enggau koko kelimpah utai tanam bukai ngambika ulih nyungkak penatai pemisi menua.
Nengah Langgur Pemansang Malaysia Ke-11 (RMK11), perintah beratika pejalai program enggau pelin program mantu raban pekebun mit awakka nyungkak penatai pemisi sida,” ku Uggah rambau Pengerami Ketuai Begulai Enggau Rayat di Betong kemari.
Berindik ari rega getah ke udah nurun sereta ngeruga penatai pemisi pekebun mit, perintah bisi nyendiaka bantu RM500 ngagai sida ke bisi ngerijista diri ba Opis Betanam Betupi.
“Perintah mega setuju meri bantu RM0.30 nyema rega getah SMR20 majak nadai rega iya nya RM4.60 sekilogram,” ku iya.
Iya madah, perintah bisi meri bantu ngagai pekebun getah ke bisi nyual getah, sida deka diberi resit ke dikeluarka Opis Betanam Betupi.
Kaban Parlimen Betong nya mega madah, pejalai Chukai Barang enggau Servis (GST) dikemanaka sekeda orang nating rayat berindik ari rega barang ke bisi ditikika sekeda pedagang.
“Pejalai GST dikelikuhka raban orang ke nadai betanggungjawap laban sida nadai mereti pasal GST.
“GST nating rayat nyema pedagang niki rega barang sengapa laban dikena sida ngambi untung.
“Nyema pekara tu nyadi, mensia mayuh ulih ngaga ripot ngagai orang ke bekuasa enggau chara mai resit,” ku iya.
Uggah madah, rayat ulih ngeripot pasal opis bekausa baka nuju Opis Kastam, Opis Menteri Dagang Dalam Menua, Gerempung Kerejasama enggau Pekara Bebeli Barang (KPDNKK) enggau Opis Residen.
“Nya alai, bala tuai raban bansa patut nemu nerang ngagai nembiak redak pasal GST awakka sida enda mudah ditipu” ku iya.
Nangkan nya, Pengulu Francis Empam Kuling madah, pejalai GST patut dikemanah ngambika rayat enda saru penemu.
Iya minta perintah ngelalau bala pedagang ngengkah kelai ba rega barang ke bisi kena chaj GST enggau ke nadai.
“Ambika banding, pedagang patut ngelai barang ke bisi GST awakka penguna nyamai ngelala,”ku iya.
Berebak enggau nya, iya nesau semua rayat di Betong terus beserakup enggau pangan diri.
“Kitai anang pambar ari pangan diri laban nya ulih ngerugi kitai empu,” ku iya.