SANTUBONG: Palan Penerebai Bilun Entarabangsa Kuching (KIA) entara sekeda pintu penama ti dikena sindiket mai dadah ke menua tu.
Sapit Menteri Dalam Menua Dato Sri Dr Wan Junaidi Tuanku Jaafar madah, pekara tu ditemu asil pansik ke dipejalai raban ari opis polis.
“Raban sindiket dadah seruran ngiga jalai tama ke Malaysia. Dulu suba raban tu suah tama nengah pintu di Kuala Lumpur, Penyangkai Kapal Kelang, Johor enggau Bayan Lepas di Pulau Pinang.
“Tang ketegal atur ti udah diteritka opis polis, kastam sereta imigresyen ba semua pinta penama nya, sindiket tu ngiga pintu bukai.
“Asil pansik ke dipejalai polis mandangka sindiket tu nguna pintu penama ke diasai sida enda dipatau enggau terit baka Kota Kinabalu, Labuan, Kuching enggau palan penerebai bilun Senai di Johor,” ku iya.
Iya mansutka penerang tu ba seiti aum pengarang berita pengudah bejadi pengawa nutup ‘Hari Anti Dadah’ Menua Renggat Nengeri Sarawak di Kampung Santubong kemari.
Berindik enggau nya, Wan Junaidi ke mega Kaban Parlimen Santubong netapka ejensi ke bekaul udah bejalaika atur ti patut ngambika sindiket enda ulih ngelarika diri ari ke ditangkap.
“Nambahka nya, kitai udah minta opis polis numbuhka Unit Pengelikun Garis Entara Menua ti diarika raban polis ke landik ngambika nemu bengkah tauka pendiau orang ti mai barang nya tama ke menua tu.
Dulu agi ari nya ba jaku bejadika pengerami nya, Wan Junaidi madah ketegal ubah dunya diatu, keruga dadah ukai semina datai ari dadah tradisional baka ke ganja enggau chandu aja.
Ku iya, dadah sintetik baka syabu, pil kuda enggau ectacy udah balat ngeruga peranak menua tu.
“Bekal dadah sintetik muntang dibai tama ketegal ti mit, ambika chunto pil ecstasy semina 0.3 gram pemerat lalu muntang ditelan enti dibandingka enggau dadah tradisional ti begunaka sekeda perengka tauka dapur,” ku iya.
Ngenang pekara ke sama, iya madah dalam atur ngemunaska penyalah gian dadah, perambu meresa raban nembiak di sekula sekalika sida bisi ngambi dadah disadang dipun ba taun 2016.
Perambu nya netapka tetiap iku nembiak sekula primari, sekondari sereta universiti deka diperesa tubuh, tandu iya.
‘Hari AntiDadah’ Menua disambut kena 19 Februari ninting taun kenyau ari 31 taun ke udah, pengudah Menteri Besai ke sebedau tu, Tun Dr Mahathir netapka dadah nyadi munsuh lumur satu menua.
Bela datai bini Wan Junaidi, Datin Sri Fiona, Sapit Ketuai Direktor AADK Izhar Abu Talib, ADUN Pantai Damai Dr Abdul Rahman Junaidi, Direktor AADK Sarawak Wan Madihi Wan Salleh enggau orang.