Dikarang Rengenyan Labang //
Tuju perambu nya ngambika Dayak dikemerat, disengkaum perintah besai dalam RMK-11: Dusit
KUCHING: Perambu Dayak pasal Langgur Pemansang Malaysia Lumpar Ke-11 (RMK-11) udah disuaka ngagai Unit Perambu Ekonomi (UPE) Opis Menteri Besai di Putrajaya ensanus.
Perambu nya disuaka Presiden Gerempung Graduet Dayak Sarawak (SDGA) Dr. Dusit Jaul ngagai Sapit Direktor General UPE Opis Menteri Besai, Datuk Nik Azman Nik Majid.
Nitihku Dr. Dusit, pekara nya diperambu ngambika bansa Dayak dikemeratka agi sereta disengkaum perintah besai dalam RMK-11 (2016-2020).
“Kami udah mujur nyuaka perambu Dayak pasal Langgur Pemansang Malaysia Lumpar Ke-11 (RMK-11) ngagai Unit Perambu Ekonomi (UPE) Opis Menteri Besai di Putrajaya ensanus.
“Perambu kami nya endang nyerangkung semua pekara tauka komprehensif ba enam pekara ti disebut UPE baka teknologi gadung, pemansang mudal mensia, ekonomi, pemansang rama enggau adat asal.
“Entara pekara ti diperambu, kami minta perintah numbuhka sebengkah Polisi Bansa Asal, ngambika tetiap aktiviti tauka program ti dilanggur perintah dikena mantu bansa Dayak dibaruh polisi nya,” ku iya madah ngagai pengarang berita.
Langgur nya mega nyebut pasal pematut perintah mantu bansa Asal di menua tu dalam pemansang tanah hak adat Bumiputera, ku iya.
“Kitai ngarapka perintah besai ulih meda langgur nya enggau positif,ti engkeman enggau bansa Dayak,” ku iya.
Kelimpah ari nya, iya madahka Gerempung Ukai dikuasa Perintah (NGO) Dayak, raban intektual sereta orang politik Dayak maya woksyop ke diatur Hari Minggu nyin kemari udah besetuju nyirika Tan Sri Datuk Amar James Jemut Masing nyadi chairman Komiti Pengemudi Dayak RMK11.
Komiti nya deka nyengkaum bala menteri kabinet Dayak tikas menua Sarawak, pengari NGO, akademik enggau tuai raban bansa.
“Iya (Masing) ti dichiri nyadi chairman nya ngambika ulih ngemataka chara RMK-11 dipejalaika awakka bansa Dayak enda tinggal ari langgur pemansang dalam timpuh lima taun ti deka datai,” ku iya seraya madahka SDGA nyadi sekretariat pengawa dalam komiti.