ENGKILILI: Rayat ke bisi dituntung penusah bah di menua Kejemut, Langkang enggau Sekula Primari (SK) Nanga Tebat ditu meri besai terima kasih ngagai pengari rayat sida laban ke udah nyuaka duit bantu empai lama ke udah.
Kenu ku sekeda rayat ba endur nya, penusah bah ke nuntung sida pun taun tu tadi meri pangka ke chukup besai lalu Opis Kaunsil Pengelikun Menua (MKN) bisi dikanggau ngesah seraya nyuaka duit bantu ngagai sida ditu.
Kaban Kunsil Nengeri (ADUN) Engkilili, Dr. Johnical Rayong bisi datai nyuaka duit bantu nya ngagai 46 iku rayat ke bisi dituntung bah.
Pengawa nyuaka duit bantu nya diatur di Dewan Serbaguna Opis Kaunsil Pelilih Lubok Antu/Engkilili (MDLA/E) ditu pagi kemari.
Seiku ari sida ke bisi nerima bantu tu, Utih Karong madah bantu ke diberi MKN nya endang berita manah ngagai sida laban duit nya ulih dikena ngaduka utai ke rusak laban bah.
Seiku agi sida ke nerima bantu, Thomas Layan madah, Rayong seiku pengari rayat ke chukup siru ngagai rayat ditu lalu iya udah mujur mutarka penanggul rayat kelebih agi bekaul enggau bantu tu.
Ba penemu Utih, bah ke nuntung sida empai lama ke udah meruan dikeingatka belama laban mayuh amat keresa rusak sereta lenyau. Duit ke diberi nya deka dikena meli barang baru.
Udah nya Banyie Rawing madah diri berasai sinu sereta beterima kasih ngagai perintah laban ke udah nyuaka bantu baka nya.
Rayong lebuh bejaku ba pengawa nya madahka, rayat di Engkilili ke suah dituntung penusah bah dikearapka ulih ngiga taba berumah ke lebih likun ngambika nadai agi kena bah.
“Kitai enda nyangka penusah bah besai baka ke udah nyadi sebarang maya, laban ke nyadi pengari rayat ditu, aku enggai meda penusah baka tu nyadi baru,” ku iya.
Sama bisi datai ba pengawa nya, Pemesai Pelilih Lubok Antu, Jack Aman Luat sereta Peribit Sekretari ADUN Batang Ai, Malcom Mussen Lamoh, Joseph Nyalau.
Berebak enggau nya, raban sida ke tasah bah bela nerima bantu RM500 seiku.