KUCHING: Parti Rakyat Bersatu (UPP) deka terus ngemeratka sitak ke dipegai pengari rayat ari parti tu dikena napi pengawa bepilih kunsil nengeri (PRN) ke deka datai.
Ketuai Sayap Nembiak UPP, Dr Johnical Rayong Ngipa madahka raban nembiak parti UPP deka naka ulih meri tumpu ngagai sitak DUN nya nengah chara ngatur lebih mayuh aktiviti dikena ngulihka sukung ari rayat.
“Dikena napi PRN, sekeda sitak DUN ke deka dikemeratka kami iya nya DUN Opar, Bengoh, Engkilili, Bawang Assan, Sri Aman, Meradong, Dudong, Palawan, Pujut, Piasau enggau Batu Kawah.
“Pekara tu deka dulu dikemeratka kami ke alai raban nembiak deka bejalaika tanggungpengawa enggau naka ulih kelimpah ari ngatur lebih mayuh aktiviti nyengkaum program ketuai begulai enggau rayat, nyaup rayat ke seranta sereta mayuh agi ke bukai dikena meri pemujur ngagai chalun ke ke bediri ngarika UPP nengah tikit BN,” ku iya.
Rayong madah munyi nya ba aum pemberita pengudah nguluka aum keterubah Komiti Pusat Sayap Nembiak UPP, kemari.
Kelimpah ari nya, dalam aum ke sama, piak sida mega udah ngemendarka empat bengkah resolusyen iya nya semua raban UPP dipinta besemaya meri sukung enggau enda betatak ngagai Menteri Wang Kedua ke mega Menteri Perintah Pelilih Menua enggau Pemansang Raban Bansa, Dato Sri Wong Soon Koh nyadika presiden parti UPP ari baruh perintah Barisan Nasional (BN).
Ku iya, sayap nembiak UPP besemaya deka meri sukung penuh ngagai Soon Koh dalam pengawa bepilih kunsil nengeri (PRN) di sitak DUN Bawang Assan kelimpah ari nyadi ketuai kimpin sepemanjai PRN ila.
“Semua raban sayap nembiak UPP mega patut meri sukung ke tegap ngagai Kaban Kunsil Nengeri (ADUN) Bengoh Dr Jerip Susil, ADUN Opar Ranum Mina sereta aku empu ke megai sitak DUN Engkilili ke alai kami semua deka mengkang bediri ba sitak ke sama dalam PRN ti deka datai.
Kelimpah ari nya, semua raban sayap nembiak UPP mega dipinta nyukung perintah ke dipegai Kepala Menteri, Datuk Patinggi Tan Sri Adenan Satem sereta Menteri besai (PM), Datuk Seri Najib Tun Razak.
Dalam awak ke sama, Rayong mega madahka sebengkah pengerami makai lemai deka diatur kena 16 Mei ke alai 130 buah mija bisi disediaka.
Taja pia, endur tauka palan alai ngatur pengerami nya empai diputuska.
UPP Pusat ke bepalan di mengeri Kuching mega dipaduka nyaga biro pelajar, biro raban nembiak, biro dagang, biro lumba enggau main, biro undang-undang sereta biro teknologi pemadah.
Urung 26 buah pampang UPP ari serata nengeri bisi datai ngulu aum nya.