KUCHING: Chairman DAP Nengeri Chong Chieng Jen ke mega Kaban Kunsil Nengeri (ADUN) Kota Sentosa besemaya deka mantaika mosyen sentang ubah ba Ordinan Interpretasyen Sarawak 2015 maya Aum Dewan Undangan Nengeri (DUN) ti disadang diatur ba bulan April tauka Mei tu ila.
Kenu ku Chong, mosyen nya deka ngangkatka nama kangau Dayak dikena nganti ‘Lain-lain’ ba form ‘rasmi’ perintah ti ngarika komuniti Dayak ari genap etnik di nengeri tu.
“Aku ngarap mosyen tu deka nerima sukung ari semua kaban kunsil baik ka nya ari perintah Barisan Nasional (BN) sereta ke bukai ngambika pemaik bansa Dayak di nengeri tu.
“Enti raban ari BN udah dulu mantaika mosyen tu, aku nadai penanggul meri sukung ketegal bela ngembuan tuju ke sama iya nya nentuka nama kangau Dayak diaku perintah besai,”ku iya ba seiti aum pengarang berita di Indu Opis DAP ditu, kemari.
Dulu agi ari nya, Chong ke mega Kaban Parlimen Bandar Kuching ngansak perintah besai nerima perambu Komiti Teknikel Bumiputera Minoriti ngambika nama kangau Dayak dikena nganti ‘Lain-lain’.
Iya ngarap perambu nya disetuju perintah besai enggau lengkas ngambika bansa Dayak ulih berengkah ngena leka sebut nya enggau sah.
Ba kaul ke sama rambau aum parlimen kenaka 11 March tu tadi, Chong bisi nanya Menteri Besai sentang pemutus perintah ba pinta bansa Dayak di Sarawak ngambika sida dikumbai nengah leka sebut ‘Bangsa Dayak’ ba form ‘rasmi’ perintah lalu ukai nya ‘Lain-lain’ tauka ‘Bumiputera’.
Menteri ba Opis Menteri Besai, Datuk Joseph Entulu Belaun rambau nyaut tanya nya madah Komiti Teknikal Bumiputera Minoriti udah diberi tanggungpengawa ari perintah ngambika ngadu pansik sereta ngulihka timbal ari bansa Dayak sentang pekara nya.
Berindik ari nya ku Entulu, randau begulai enggau raban profesional sereta gerempung ke ukai dikuasa perintah (NGO) bisi diatur di Sibu, Miri enggau Kuching ba bulan Februari 2015.
Asil ari randau nya, raban profesional enggau NGO Dayak setuju lalu netapka diak leka sebut Dayak dikena nganti ‘Lain-lain’ ba form ‘rasmi’ perintah.
Kelimpah ari nya, Komiti Teknikal Bumiputera Sabah enggau Sarawak kenaka 5 March 2015 bela setuju sereta merambu ngena leka sebut Dayak nganti ‘Lain-lain ba pom perintah nuju kabinet perintah besai.