SARIKEI: Raban orang indu patut nyikap diri enggau pengelandik ke relevan, kreatif sereta bepenemu ngambika lebih kompetitif napi pemar globalisasyen kemaya hari tu.
Komiti Serakup Bansa Dayak Menua Sarawak (SDNU), Chambai Lindong madah, raban indu patut lebih berani ngubah runding enggau pikir sida dikena nyungkak tikas pengidup kelimpah ari nempa mayuh runding ke kreatif sereta pintar ngeradang peluang ke bisi disediaka.
“Dalam raban bansa tradisional, raban indu ngembuan tanggungjawap ke enda tentu mar iya nya semina nyaup raban lelaki dalam pengawa ke dikereja.
Pekara tu ulih dipeda kitai dalam pengawa ke dikereja baka gawa ba uma tauka kebun ke alai orang indu nyauk laki sida ngereja pengawa betanam sereta ngetau padi.
“Taja pia, ubah pemansang kemaya hari tu ngelalau semua kitai ngambika enda jauh tinggal awak pemansang.
Aku pechayaka raban orang indu deka nempa pemujur kediri empu nengah chara ke lebih teratur,” ku iya.
Iya mansutka jaku nya lebuh ti bejadika Pengerami Serumpu Merarau Dalam Serakup ke diatur Serakup Indu Dayak Sarawak (SIDS) Pampang Sarikei, di sebuah restauran tebilang ditu, kemari.
Pengerami tu digulu urung 200 iku raban SIDS Pampang Sarikei sereta raban EXCO SDNU.
Kenu ku Chambai, raban orang indu enda tau ngembuan runding ke lemi lebuh ti napi mayuh pemar, tang nyadika pemar nya sebengkah chara dikena nempa pemujur dalam semua sukut.
Nya alai, raban indu kemaya hari tupatut lebih berani nempuh sereta napi sebarang bansa pemar enti deka nyapai pemujur dalam semua pekara nyengkaum bepekit enggau manah dalam ngulihka pemujur kelebih agi lebuh ti besemekih enggau raban lelaki.
“Raban indu ukai semina mangku pengawa mutarka semua pekara dalam ruang bilik, tang mega nyadika ejen meri ubah pemansang.
“Kita mesti nemu sereta pintar meratika pekara tu laban orang indu chukup besai guna dalam ngemansangka menua tu.
Taja pia, semina sida ke seruran nyikap diri enggau runding ke tajam, kering semengat sereta kuat pegai pengarap mujur mangku tanggungpengawa ngamatka juluk tu,” ku iya.
Ku iya nandu, status raban indu kemaya hari tu betambah manah, bisi sekeda ulih megai tanggungpengawa ke besai ke sebedau tu semina dipegai raban lelaki aja.
“Pekara tu tau nyadika peransang ngagai raban indu sereta patut dikerembaika.,” ku iya.
Kelimpah ari nya, Chairman SIDS pampang Sarikei, Rosy Jita Sidok madahka program nya diatur dikena meri peluang ngagau semua raban komiti SIDS enggau SDNU ngedut kaul ke lebih manah.
“Dalam perambu kitai taun tu, piak SIDS mega udah merambu deka lebih ransing sereta chakah dalam semua aktiviti ke diatur ,” ku Rozy.
Ba awak ke sama, Chambai mega madahka Menteri Pemansang Rama Sarawak, Tan Sri William Mawan Ikom bisi ngungkupka agih belanja RM5,000 ngagai serakup nya.