Dikarang Rengenyan Labang//
PERINTAH SIRUKA ORANG BERIKAN: Ismail (tengah) berandau enggau sekeda orang berikan sitak Parlimen Santubong kemari madahka perintah beratka pengelantang orang berikan.
KUCHING: Perintah ngelalau orang berikan di nengeri tu nyeliahka diri bejualka ikan ngagai orang tengah ngambika sida enda bangat rugi.
Menteri Pengawa Bumai enggau Industri Betanam Datuk Sri Ismail Sabri Yaakob madahka, ngelama tu penguntung orang berikan enda besai ketegal ti bisi orang tengah.
Iya madahka perintah mayuh nyendiaka program pemansang di Sarawak dikena nyungkak penatai pemisi orang berikan di menua tu lalu ulih nyeliahka sida ari orang tengah.
“Juluk ati aku deka meda pengidup orang berikan berubah iya nya ngembuan penatai pemisi ke manah asil ari pengawa berikan.
“Dikena nambah tauka ngangkatka penatai pemisi diri, orang berikan tauka gerempung orang berikan patut nyeliahka diri ari orang tengah, laban sida (orang tengah) ngambi peluang ba orang berikan iya nya nyual ikan ngena rega tinggi taja pan sida (orang tengah) meli ari orang berikan ngena rega ke jauh mudah.
“Enti orang berikan tauka gerempung orang berikan ulih ngemunaska orang tengah, asil penatai pemisi orang berikan ulih nambah manggai 20 peratus.
“Mayuh program pemansang dipejalaika perintah dikena mantu orang berikan ngambika enda ngena orang tengah baka nyendiaka pasar orang berikan ngambika ikan ti baru nya ulih dijual orang berikan terus ngagai penguna,” ku iya seraya madahka di Sarawak diatu bisi enam buah pasar orang berikan udah dibuka.
Ismail mansutka penemu iya lebuh bejaku seraya bejadika ‘Program YAB Menteri Bersama Nelayan Wilayah Kuching & Penyerahan Elaun Sara Hidup Nelayan’ ti diatur ba Dewan Hikmah Petra Jaya ditu, kemari.
Entara program pemansang ti dipejalaika dikena mantu orang berikan Sarawak ku iya baka Pasar Tani FAMA ke alai enam buah Gerempung Orang Berikan Menua (PNK) udah nyereta (pasar betanam FAMA), sabsidi diesel/patrol enggau ke bukai.
Perintah ku iya bisi nyendiaka duit jali ari TEKUN awakka enda ngena orang tengah sereta dikena ngurangka tating pengidup orang berikan, perintah bisi meri Elawin Nupi Diri enggau Program Khas Rumah Orang Berikan (PKPN)
“Berengkah Januari taun tu (2015) penyampau Elawin Nupi Diri ungkup orang berikan bisi ditikika iya nya ari RM200 ngagai RM300 sebulan (ngagai orang berikan pantai) lalu orang berikan laut dalam RM250 sebulan.
“Kebuah perintah ti nambahka elawin nupi diri nya laban lebuh rega minyak niki perintah ngaga pemutus ngurangka tauka nadai meri sasbsidi, ari nya kitai ulih ngelimat belanja.
“Lalu asil ari belanja ke dikelimat nya kitai ulih meri pulai baru penguntung ngagai rayat. Tu sebengkah ari chunto bekelimat belanja ari ngurangka sabsidi,” ku iya dalam aum pengarang berita madahka di Sarawak urung 8,532 iku orang berikan sereta bisi 19 buah Gerempung Orang Berikan.
Dulu ari nya Ismail nyuaka Elawin Nupi Diri ngagai 619 iku orang berikan sitak Parlimen Santubong.
Sama bisi ba pengerami nya kemari, Sapit Menteri Muda Betanam Betupi (Gerempung Orang Bumai Bekebun) Datuk Sylvester Entrie, Menteri Muda Betanam Betupi (Pemansang enggau Dagang) Datuk Mong Dagang, Sekretari Mendam Opis Menteri Betanam Betupi Moden Datu Dr. Ngenang Jangu sereta Sapit Ketuai Direktor Opis Pemansang Ikan Malaysia Sa’dom Abd Wahab enggau ke bukai.