MIRI: Rayat di nengeri tu endang arap sereta andalka pengelurus Kepala Menteri (KM) Sarawak, Tan Sri Adenan Satem dalam ngemansangka nengeri tu ngagai tikas ke lebih mansang baka nengeri bukai.
Kaban Parlimen (MP) Sibuti, Ahmad Lai Bujang madah, nyau deka manggai setaun Adenan megai perintah nengeri tu, mayuh pemansang mujur ditempa kelebih agi dalam sukut politik, ekonomi sereta sukut rama.
“Entara pemerani ke bisi ditunjukka KM iya nya nurunka rega elekterik, ngemunsaka jenayah neresa kampung enda belisin, ngemunaska pengawa makai suap sereta minta perintah besai ngenikika penyampau royalti minyak ngagai 20 peratus ungkup nengeri Sarawak,” ku iya.
Ahmad Lai mansutka jaku nya lebuh dikerandau raban pemberita beserimbai enggau penemuai basa raban Lembaga Amanah Kebajikan Melayu Miri (LAKMM) ke betuaika Sekretari Eksekutif, Jamil Bujang di Opis Servis MP Sibuti di Piasau kemari.
Kelimpah ari nya, Ahmad Lai juga mega muji Adenan seiku pemesai ke chukup chakah bejalaika pengawa ngetanka hak rayat sereta ngemeratka pengelikun rayat nengah chara nagang raban ekstremis politik enggau pengarap tama ngagai nengeri tu.
Penatai raban ekstremis ke nengeri tu ngenangika rayat, takutka runding rayat dirachun penemu jai ke semina ngenataika penyarut entara raban bansa di nengeri tu.
Ku tandu iya, Adenan minta penyerakup sereta keul ke manah entara raban bansa di nengeri tu terus dikemeran kelimpah ari nyaga pengelikun sepanjai maya ngambika nengeri Sarawak muntang nyapai pemansang.
“Semengat 1Malaysia udah lama dikemeranka di Sarawak. Endang nyadika juluk ati Kepala Menteri deka meda semua rayat begempung enggau pangan diri dalam ngemansangka nengeri tu,” ku iya.
Ahmad Lai mega pechaya sereta andalka penyikar Adenan dalam merintah nengeri tu ke alai lebih mayuh bansa pemansang ulih ditempa dikena meri pengelantang ngagai semua rayat kelebih agi rayat menua pesisir.
Beduduk ari nya, iya ngelalau rayat ngambika lebih pintar berunding sereta nyelihaka runding sida ari pechayaka sebarang jaku pejah sereta petenah piak luar ke seruran deka bejai program pemansang sereta polisi ke dikemeranka perintah.
Dulu ri nya, Ahmad Lai ke mega Sapit Chairman LAKMM nyuaka bantu RM10,000 ari LAKMM dikena mantu rayat nengeri Sarawak enggau rayat di Pantai Timur Semenanjung Malaysia ke dituntung penusah tasah bah empai lama ke udah.
“Kitai chukup beterima kasih ngagai LAKMM laban ti ngembuan penyiru ati dalam ngelempungka tating penusah pengidup ke ditapi rayat,” ku iya.
Bantu nya disuaka ngagai Ketuai Tabung Baitulmal Sarawak (TBS) Miri, Marini Juraibi ke ngarika Indu Opis TBS.
Ku Marini, TBS udah dipinta Majlis Islam Sarawak ngumpul bantu nya ari baruh program ngumpul bantu belanja dikena mantu rayat ke dituntung penusah tasah bah.
Dalam program nya, LAKMM mega nyuaka bantu RM300 ngagai dua buah ruang bilik ke dituntung penusah rumah angus di Pujut Empat kena 15 Februari empai lama ke udah.
Dua buah rumah angus diempa api dalam penusah angus ke nyadi urung pukul 9 malam ke alai 11 iku peranak napi pengerugi ke dukup ngenyinuka ati.
Sama bisi datai, Temenggung Abdul Rahman Fadzail sereta Kaunsilor Khatijah Datuk Muip.