KAPIT: Raban Ex-nembiak sekula sebengkah Sekula Primari China SJK (C) Hock Lam ditu ke ada entara taun 1971 nyentuk 1983 udah mujur mupu belanja urung RM 6,000 dikena mantu sekula sida nya.
Pengawa nyuaka duit nya dikenataika dua iku ex-nembiak sekula nya Wong Hau Siong enggau Tiong Ping ngagai Chairman Unit Pengatur Pengawa SJK (C) Hock Lam, Larry Sng Wei Shien sereta disempulang Kepala Pengajar, Wong Siew Ching.
Chairperson Komiti Begunan Sekula, Kaunsilor Ma Bee Kuan sereta raban komiti bukai Sia Weng Kwong enggau mayuh agi ke bukai.
Pengawa ti nyuaka duit nya diatur ba rumah Larry Sng empai lama ke udah.
Nitihka penerang Tiong Ping sereta Wong Hau Siong, sekula nya deka digagaka begunan baru ke ngembuan 14 buah bilik kelas dikena nukar begunan kelas lama ke digaga ari kayu ke dipadahka Opis Kereja Raya enda likun alai bejalaika pengawa sekula laban ti ngundan mayuh penanggul.
“Kami ngaga pemutus ngiga belanja dikena mantu sekula tu ke alai kami mujur teulihka ungkus belanja RM6,000.
“Tu mih maya kami patut meri bantu ke patut ngagai ex-sekula kami,” ku Tiong Ping.
Nangkanka nya, Kaunsilor Ma Bee Kuan madahka ungkus belanja dikena ngaga beguan sekula baru nya dipelabaka manggai RM 1.5 juta.
Ngagai mensia mayuh ke gerah jari deka mantu mata duit ngagai sekula tu tau ngenataika bantu ngagai sekula SJK © Hock Lam nengah lumur akaun, Public Bank 318 563 0904 tauka telefon ngagai sekula nya nengah lumur 084 796371. Sebarang bantu mata duit ke dikenataika deka diberi risit, pia ku Kaunsilor Ma Bee Kuan.