Chalun ke dikeandal ulih menang bediri ngarika BN maya PRN ila meseti dipilih ari parti serakup BN empu
SIBU: Chalun ke dikeandal ulih menang sereta ngetanka semua kerusi Kunsil Nengeri (DUN) maya pengawa Bepilih Besai Kunsil Nengeri (PRN) ila meseti chalun ke datai ari parti serakup Barisan Nasional (BN).
Presiden Parti Progresif Demokratik Sarawak (SPDP) Dato Sri Tiong King Sing madah, chalun ke dikeandal ulih menang nya meseti ari parti serakup lalu ukai ari luar parti BN.
“Chalun ke dikeandal ulih menang enda patut dipilih ari luar parti serakup Barisan Nasional,” ku iya madah ngagai pemberita beserimbai enggau Pengerami Taun Baru China (TBC) SPDP di Dewan Suarah Sibu, kemari.
Tiong ke mega Kaban Parlimen Bintulu madah munyi nya lebuh dipinta nimbal penemu Kepala Menteri empai lama ke udah ke bisi nyebut sentang pengawa magi kerusi ungkup parti serakup BN bepelasarka chalun ke dikeandal ulih menang.
Lebuh ditanya sekalika SPDP deka ngetanka semua penuduk lapan kerusi DUN ke endang dipenggi sida sebedau tu, Tiong madah sida tetap ngetanka penuduk nganti udah datai maya iya ila.
Ngenang sentang 11 kerusi DUN baru, iya madah agi kelalu tumu bejaku pasal kerusi ke deka dibagi ungkup parti serakup BN nya.
“Agi tumu bejaku ngenang pekara tu. Anti nyentuk pemutus nyemetak digaga raban ketuai BN,” ku iya seraya madahka kerusi DUN baru nya ila deka dibagi entara parti serakup BN.
Tiong mega madahka, agi kelalu tumu endur SPDP nentuka kerusi ke diining sida ungkup DUN baru nya.
DUN baru ke diperambuka Komiti Pengawa Bepilih Besai (SPR) iya nya N13 Batu Kitang, N17 Stakan, N18 Serumbu, N23 Triboh, N26 Gedong, N40 Kabung, N57 Tellian, N63 Selirik, N66 Murum, N70 Samalaju enggau N78 Long Lama.
Ngenang sentang Pengerami Taun Baru China ke diatur SPDP keterubah ditu, Tiong madahka diri berasai chukup gaga meda pemayuh mensia ke ngulu pengerami nya.
“Terima kasih ngagai mensia mayuh di Sibu sereta sida ke besemak laban meri sukung ngagai SPDP beserimbai enggau Taun Baru China ke sekali tu,” ku iya.
Pengerami TBC tu diatur SPDP sitak tengah menua Sarawak lalu digulu lebih 5,000 iku pengabang.
Sama bisi datai chairman SPDP Pelawan Dato Lau Cheng Kiong, chairman SPDP Dudong Teo Boon Siew, chairman SPDP Bukit Assek Joseph Lim, chairman SPDP Bawang Assan Wong Hua, Ketuai Indu SPDP Sibu Rhoda Ting sereta bala bukai.