Polisi ti udah dipejalaika Adenan iya nya semua kabinet besumpah ba mua MACC, enchuri kayu sereta isu NCR
Dikarang Rengenyan Labang //
KUCHING: Menteri Dagang Temuai Datuk Amar Abang Johari Tun Openg muji polisi baru ti engkeman ke dipejalaika Kepala Menteri Datuk Patinggi Tan Sri Adenan Satem, mai pemanah, pemaik enggau pengelantang ngagai nengeri enggau rayat.
Iya madahka polisi baru nya patut disukung ke pemanah enggau pengelantang menua sereta rayat.
“Kenyau iya (Datuk Patinggi Tan Sri Adenan Satem) nyadi Kepala Menteri, iya bejalaika tiga polisi ti nyata nyengkaum bekaul integriti ke alai semua kabinet nengeri udah ngangkat sumpah ba mua MACC, isu ngambi kayu belalai sereta isu NCR.
“Nambahkan nya, setipak endar enggau pengerami kitai diatu, iya nya isu ekstremis, iya (Adenan) ngenggaika pentai raban ekstemis datai ke Sarawak. Iya lebih ngemeratka penyerakup, pemaik enggau pengelantang.
“ Agi Mayuh polisi deka dipejalaika iya (Adenan),” ku iya ti mega nyadi Menteri Pengawa Berumah dikerandau lebuh datai ngabang ngagai nyerumba Taun Baru China 2015 SUPP (Parti Rakyat Bersatu Sarawak) ti diatur ba indu opis parti nya.
Bela bisi datai sereta dikerandau ngulu pengerami nya, Sekreteri Besai SUPP Datuk Sebastian Ting ti madahka Adenan ketuai ti nadai belalai.
Iya madahka nengah iring Kepala Menteri, nengeri Sarawak nadai penanggul enggau isu bekenaka leka jaku ‘Allah’.
Kepala Menteri mega tampak madahka nengeri tu enda nerima UMNO tama kitu, ku iya.
“UMNO enda diterima masuk ke Sarawak, kitai nadai penanggul pasal ngena leka jaku ‘Allah’ ti dikena betaun-taun ke udah enggau ke bukai, semua nya beduduk ari iring enggau penerang Kepala Menteri ti nadai belalai.
“Nya mai pemanah ke nengeri enggau rayat, nya alai aram meh kitai semua besampika pengerai iya ngambika ulih terus ngiring Sarawak,” ku Ting.