SIBU: Raban nembiak ke bisi ngambi bagi dalam Program Bantu College of Technology Sarawak (UCTS-CARE) ngembuan pengingin ati deka meri lebih mayuh bantu dikena nulung komuniti ke ditinggang penusah.
Mark Meringgai John, 22, nembiak taun keterubah ‘School of Business and Management’ nguna maya semester pandak iya nyeretai tim meri bantu ngagai peranak menua tu ke ditinggang penusah tasah bah di nengeri Pahang.
“Endang manah enti aktiviti ke baka tu mengkang diteruska laban mayuh pemanah deka diterima semua piak kelimpah ari ngelatih raban pemeri bantu ngambika lebih siru nyaup peranak ke begunaka bantu,” ku Mark.
Ku iya, mayuh kenang beguna bisi diasaika iya lebuh ti nyeretai tim bantu nya.
“Nyadi ke pengaga kitai peranak Sarawak laban ti gerah jari meri bantu ngelempungka tating penusah pengidup ke ditapi peranak menua tu ke ditinggang penusah tasah bah.”
Vivienna Sen, 21, mega seiku nembiak ‘School of Business and Management’ke belajar belajar ba University College of Technology Sarawak (UCTS) belajarka mayuh penemu lebuh ti nyeretai tim bantu nya.
Sebaka enggau Mark, Vivienna mega belajarka pemanah adat enggau kaul peranak nengeri ke dituntung penusah nya.
Rachel Rosphia Claude, 23, nembiak ‘Bachelor of Electrical Engineering’, madahka diri bisi ngembuan pengelandik ke enda disadang pengudah nyeretai tim bantu nya.
“Aku enda nemu diri bisi ngembuan pengelandik nyura sampaika aku berengkah nyura ba sekula ke endur aku nampung pelajar diatu,” ku iya.
Ketuai tim bantu, Rahmat Aidil Djubair, 35, beterima kasih ke penyerakup enggau kerejasama ke dikemeranka semua raban pemeri bantu sepemanjai misi nya dipejalaika.
Seiku agi raban ketuai tim ke mega seiku lecturer dalam bidang komputer, Gary Loh madahka raban nembiak ke nampung pelajar ba palan sekula tinggi patut disediaka enggau pengawa luar dikena sida ngemanahka tikas pengelandik sida bejau ba mua mayuh.
“Ba universiti, kitai begunaka sistem belajar engggau ngajar ke holistik.
“Kitai patut neruska program baka tu laban mayuh penguntung sereta pemanah ulih ditempa asil ari program nya,” ku Loh.
Dulu ari nya, urung 27 iku nembiak ari UCTS iya nya 17 iku ari ‘School of Business and Management’ sereta 10 iku ari ‘School of Engineering and Technology’ bisi nyeretai tim meri bantu ngagai peranak nengeri Pahang ke dituntung penusah tasah bah belabuh ari 26 nyentuk ngagai 31 Januari taun tu tadi.
Tim nya diiring 8 iku raban pengajar enggau staf UCTS, lima iku raban pengajar, dua iku ari Unit Pengurusan sereta seiku ari Unit Pengurusan Nembiak.
Sapit Chanselor UCTS (Akademik), Professor Dato Dr Sabarudin Mohd sereta Professor Dr Ahmad Othman (Dean of the School of Business and Management) sama bisi nyeratai tim bantu nya.