SARIKEI: Ulah orang ke nunu lebih sepuluh igi tayar ba sebengkah palan pemuai uras di Jalai Kwong/Ming Minah ditu ngujungka mensia mayuh ke diau besemak ringat.
Seiku peranak ke dikangau nama Lim madahka ulah orang ke nunu tayar nya ngujungka sida ke diau semak palan nya enda nyamai asal laban ke ditepuk bau asap tayar.
“Penanggul tu suah nyadi kelebih agi maya uras udah mayuh lalu ditunu nyengkaum tayar jai ke dibuai ba palan nya ditunu begulai enggau uras bukai.
“Tebal agi pekara tu nyadi maya pagi hari tauka mua ke lemai.
“Ulah baka nya meri penanggul besai lebih agi ngagai peranak ditu bisi ngembuan anak mit,” ku Lim.
Ku tandu iya, ulah piak enda beradat nya mega ngujungka palan muai uras tu nyadi sebengkah ari palan nyamuk betansang.
Seiku peranak ke semina dikelala enggau nama Kwang, 50, iya madahka sebedau tu (taun nyin kemari), piak enda beradat dipeda nunu uras dalam tong muai uras ke disediaka piak bekuasa (PBT).
“Ulah nya ngujungka tong sampah nya mega angus begulai enggau uras.
“Penanggul bukai ke bisi nyadi beduduk ari ulah enda beradat nya, babas ke semak enggau palan nya mega retung.
“Tang naka ke diatu, penusah babas angus ke bisi nyadi enda kelalu besai, tang bisi mega ngasuh kami irau, nangika nyerarai ngagai rumah kami,” ku tandu iya.
Kededua peranak nya bisi ngenataika penanggul ke ditapi nya ngagai piak bekuasa sereta minta penusah nya enda agi nyadi udah tu laban enti pekara nya enda dikemerat, mayuh penusah bukai deka nyadi.
Pemesai Opis Pengerara Api enggau Penyah Penusah (BOMBA) Sarikei madahka piak sida bisi nerima kangau ari mensia mayuh bekaul enggau penusah nya ke nyadi urung pukul 5.30 lemai kemari.
“Pengudah nerima kangau nya, sebuah tim BOMBA datai ngesah ngerara api ba endur nya.