MIRI: Raban bansa Orang Ulu ulih mujur dalam pengawa dagang enti nyema sida nitihka chara bansa China ke udah maju dalam bidang nya.
Kaban Kunsil Nengeri (ADUN) Telang Usan, Dennis Ngau madahka mayuh kompeni besai baka Kompeni Shin Yang, Samling sereta Interhill entara kompeni ke patut dijadika chunto ketegal pemujur ke dikembuan kompeni nya nyentuk ke sehari tu.
“Kitai meseti belajar ari raban bansa China ke udah mujur dalam pengawa dagang, enti deka bulih pemujur dalam bidang tu, Orang Ulu patut ngembuan komitmen sereta pengeransing ke enda nemu padam dalam semua pengawa ke dikereja,” ku iya.
Dennis madah munyi nya lebuh ti bejadika pengawa nutup ‘Program Pembangunan Keusahawanan’ ke diatur 1M Sarawak kena Hari Minggu tu tadi.
Kenu ku iya, Orang Ulu patut ngembuan komitmen sereta sabar napi sebarang penanggul dalam pengawa dagang laban pemujur enda ulh datai ngapa enti nadai pengeransing.
“Mayuh kompeni besai kemaya hari dipeda chukup tegut bediri ketegal ti ransing ngulihka pemujur dalam pengawa dagang sereta enda kala ngsaika pengelemi tajapan betapi enggau mayuh penanggul,” ku tandu iya.
Kelimpah ari nya, ku iya, enti raban bansa China muntang bulih pemujur dalam pengawa dagang, nadai kebuah raban bansa Orang Ulu enda ulih nunda pemujur sida.
“Dalam pengawa dagang, timpuh pemadu mar tauka pedis iya nya dalam kandang setaun nyentuk ngagai lima taun, tang sebarang orang dagang patut sabar betunga enggau pekara nya enti deka nyapai pemujur dalam bidang dagang,” ku iya.
Ku tandu iya, dikena kitai nyapai pemujur sereta ngembuan kaul enggau kompeni besai, Orang Ulu patut bekerejasama dalam sebuah tim dikena nyapai juluk ke dikeinginka hati.
“Pemadu beguna, sida patut bebasaka pekereja peribit sereta meri servis tauka bantu ke pemadu manah ngagai sida kelebih agi dalam semua pengawa ke dikereja ke bekaul enggau projek sereta ke bukai,” ku tandu iya.
Iya ngelalau Orang Ulu ngambika lebih chakah sereta aktif dalam industri dagang tengan pemesai ke dipeda ngembuan awak ke lebih muntang alai sida bulih pemujur.
Program nya digulu urung 30 iku raban penyereta orang dagang bansa Orang Ulu, empai lama ke udah.