MIRI: Pengagit peranak RPR Batu 6 ditu ti keran deka bisi sebuah jematan dikena ngelawa kandang Piasau Utara 4 deka nyadi nyata enda lama agi.
Sapit Chairman Komiti Tetap Servis Bandaraya (CI), Opis Kaunsil Mengeri Miri (MBM), Kaunsilor Bruce Chai madahka kereja ti deka ngaga jematan nya deka berengkah dipejalaika tengan taun tu.
“Jematan tu ila deka meri pengelantang ngagai peranak RPR lebuh ti nurun ngagai mengeri Miri nengah Piasau Utara 4 ngagai Simpang Empat Pujut Tujuh.
“Diatu peranak endang nadai chara bukai kelimpah nengah jalai nyelawit ba seberai stesyen Petronas di Pujut Lapan ke chukup enda likun ngagai sida tauka deriba jauh nyentuk ngagai Lutong baru nikal ke puak pasar,” ku iya.
Jematan dua lorong nya deka digaga ba atas parit ampuh bah enda jauh ari padang main bol RPR.
Bruce ke mega Chairman Komiti Genturung Pendiau (RC) Zon Pujut madah, jematan ke ngembuan pemanjai urung 50 kaki nya diadang ulih tembu dalam timpuh dua bulan ke alai pengawa ngaga jematan nya ila deka mungkur pengawa ngaga sistem nagang penusah ampuh bah.
“Pengawa ti ngaga sistem nagang penusah tasah bah ba baruh jematan nya ila mega deka ngemanahka agi sistem parit ba endur nya,” ku iya.
Bruce madah munyi nya lebuh dikerandau pengarang berita beserimbai enggau Randau Begulai enggau Peranak Genturng Pendiau nya ke diatur Majulah Miri di RPR nya lemai kemari.
Bahagian Landskap MBM deka nukar tiang gol ke baru ba padang main bol nya kelimpah ari bejalaika pengawa nyarau pun kayu ke dipeda ngachau pengelikun peranak ba endur nya.
“Tu asil ari randau enggau peranak kena bulan September taun nyin kemari.
Kompelin ke diterima ulih ngelala sereta nentuka ni bagi penanggul ke ditapi peranak sebedau sebarang atur ke pemadu manah dipejalaika dikena mutarka penanggul nya,” ku iya.
Majulah Miri bejalaika bantu sida nengah tiga buah pusat servis iya nya Pusat Servis Hii King Chiong, Pusat Servis Hii Chin sereta Pusat Servis Chin Chai Kong.
Nengah awak betemu nya, raban pengereja pengawa enda begaji mantu peranak nya ngenataika kompelin enggau serbana sida ngagai piak bekuasa sereta ejensi ke bekaul.