SIBU: Kira RM100,000 agih belanja udah diungkup dikena ngaga jalai ngelawa Rumah Suda Majuy di Bawang Assan nengah Quick Win Project 2015 di sitak Kunsil Negeri (DUN) Bawang Assan.
Sekretari Politik Kepala Menteri Andrew Shilling Banggit madah, projek ke deka berengkah enda lama agi nya mungkur pengawa nimbuk tanah enggau ngaraka batu ba jalai.
“Kebuah pia laban jalai ba madang kerapa nya alai tanah patut ditimbuh dulu,”ku iya madah ngagai pemberita pengudah ngabas projek nya, kilah ensanus.
Dulu ari nya, Andrew ngarika Kaban Kunsil Nengeri (ADUN) Bawang Assan, Dato Sri Wong Soon Koh. Sama bisi datai iya nya Penulung Peribit Wong, Johny Weiss sereta pengari Opis Kereja Raya Sibu.
Kenu ku Andrew, pengari rayat menua nya deka ngulihka mayuh agih belanja dikena ngaga jalai sepanjai 160 meter laban agih belanja ke bisi diatu enda chukup.
Pengawa ngaduka jalai sepanjai 40 meter ngelawa rumah panjai ari Jalai Sibu – Tanjung Manis enggau 120 meter agi mua rumah panjai.
Kelimpah ari nya, ku iya rayat rumah panjai mega bisi minta bantu digaga parit ngelinggi rumah sida.
“Pengari rayat ditu deka berundingka peminta nya laban rayat ditu endang seruran nyukung Barisan Nasional,” ku Andrew.
Rumah Suda panjai 24 pintu diuan urung 140 iku mensia, 50 iku ari sida nyadi pengundi ke udah dirijista ungkup sitak DUN Bawang Assan.