KUCHING: Perintah nyangka begunaka urung RM80 nyentuk RM100 juta dikena ngemanahka infrastruktur di serata Sarawak ti rusak ketegal bah tu tadi.
Netapka pekara nya, Menteri Pemansang Infrastruktur enggau Penyambung Dato Sri Michael Manyin madah anggar kasar nya digaga Opis Menteri Kereja Raya (JKR) Sarawak ke alai 101 jalai bisi udah rusak rambau penusah.
“Ba penusah bah ke nyadi bedau lama tu tadi, 42 bengkah jalai alun di Pelilih Kuching bisi udah rusak, Samarahan 33, Sri Aman 1, Betong 7, Bintulu 1, Mukah 13 enggau Limbang 4.
“Kitai nyadang urung RM80 ngagai RM100 juta belanja diguna dikena ngangkatmanah semua jalai ke rusak lalu ba sekeda kandang endur, pengerusak nya chukup balat baka ke ba Puncak Borneo.
“Entara jalai bukai ke balat rusak iya nya Jalai Bau – Krokong, Jalai Ulu Sebauh Bintulu enggau Jalai Ulu Babo Roban,’ku iya.
Manyin mansutka jaku tu ba sebengkah aum pengarang berita pengudah ngulu pengerami bejadi Board of Engineers Malaysia (BEM) RoadShow 2014/2015 ti dikemujur Menteri Kereja Raya Dato Sri Fadillah Yusuff ba sebengkah hotel ditu, kemari.
Ngenang sentang jalai di Puncak Borneo ti udah runtuh, Manyin madahka enda kurang RM10 juta belanja deka dikena ngemanahka jalai nya.
Ku iya, perintah nengah JKR benung berunding chara pemadu manah dikena nyambung jalai ke udah putus nya.
“Sekalika kitai deka ngaga jematan panjai tauka ngaga jalai baru, semua dilempaika ngagai JKR ngaga pemutus,’ku iya.
Ba kaul ke sama, Fadillah minta JKR beratika baru tikas jalai di KM35 Batu Danau, Jalai Limbang nuju Tedungan ke balat diampuh ai.
Ku Fadillah, jalai nya udah digaga tinggi dulu suba tang mengkang diampuh ai rambau penusah ke nyadi bedau lama tu tadi ti ngujungka mayuh entuka enda ulih neruska pejalai.
“Kitai minta JKR ngangkatmanah tikas jalai ba Batu Danau ngagai tikas ke enda diampuh ai sereta ulih nyeliah jalai arika putus.
Jalai nya mega deka disikap ngena kelebat ngambika tau ngelanchar pejalai ai,”ku iya.