Dikarang Chris Bishop //
KUCHING: Opis Menteri Kereja Raya (MoW) deka netapka atur gawa ti ngemeratka pengelikun; ‘Safety First’ ba tiap palan pengawa berumah sereta pengawa bukai ke bekaul.
Bejaku maya bejadika ‘Board of Engineers Malaysia (BEM) Road Show 2014/2015’ , Menteri (MoW) Dato Sri Fadillah Yusuff madah, tusun kereja diguna ngambika ulih mutar sereta nyeliah sebarang penusah ke tau nyadi maya pengawa dipejalai.
“Aku ngakun, penusah ke udah nyadi ba palan berumah enggau pengawa bukai ke bekaul dalam timpuh berapa taun tu enda diintu tauka dipansik enggau manah.
“Berindik ari nya, aku ngansak semua orang ke ngaul diri ba industri berumah berundingka isu tu enggau berat lalu ngiga jalai mutar.
“Aku meri jamin ngagai semua orang ti ngembuan kaul enggau pengawa tu, runding enggau penemu ti dikenataika sida deka diperunding opis menteri kelebih agi ba pengawa nentuka polisi enggau pelin ungkup pemaik industri berumah,’ku iya.
Fadillah nambah, MoW ngasai tusun kereja ‘Safety First’ patut dikemeran nengah penau, undang-undang lalu diterit nitihka pematut.
Nengah runding ti ngemeratka pengelikun, pengerai enggau pemaik semua ke bekaul, tusun kereja tu tau meri pangka ke manah ba atur belanja, tandu iya.
BEM RoadShow 2014/2015 berambaika leka jaku ‘Staying Relevant’ nya diadu sehari lalu digulu ra-ban engineer ari mayuh bengkah kompeni enggau ejensi perintah.
Bela datai Menteri Pemansang Infrastruktur enggau Penyambung Dato Sri Michael Manyin, Direktor JKR Sarawak Ir. Zuraimi Sabki, Presiden BEM Ir. Annies Md. Ariff enggau orang bukai.