SIBU: Peranak di pelilih mit menua Song di bagi menua Kapit irau ati ke stuk petrol ba kandang menua nya ti abis kenyau ari Hari Empat tu tadi.
Suntuk stuk petrol nya ngentaika penanggul ngagai sida ti ngena perengka pengangkut darat enggau sungai.
“Apai indai lebih agi tusah maya deka nganjung anak sida ke sekula sekalika ngena kerita tauka perau panjai,” ku Daisy Unggang madah ngagai Bernama.
Ku iya, stuk petrol ti diundan ngena tungkang ari Kapit patut datai malam tadi (ensanus), tang lebuh iya datai ba stesyen minyak di pasar Song pagi tadi (kemari), stesyen minyak bedau nerima bekal nya.
Berindik ari pekara nya, iya ngasurka mutosikal iya pulai ke rumah ti urung dua kilometer laban ti abis minyak.
Nitihku iya, penanggul suntuk stuk petrol ukai semina nyadi ba ba stesyen minyak di darat tang mega stesyen minyak ke melepung ba sungai.
“Diatu kitai semina nganti penatai tungkang ke mai stuk petrol ari Kapit,” ku iya.
Nitihku akak iya Doris, bisi sekeda peranak rumah panjai ti datai ngena perau ari ulu Sungai Katibas enda ulih pulai baru laban enjin sepit sida abis minyak.
“Sida bemalam ba rumah kaban belayan ditu tauka ba rumah tumpang nyema nadai kaban belayan lalu nya amat ngenusahka sida,” ku iya.
Ketuai Pampang Opis Menteri Dagang Dalam Nengeri, Koperasi enggau Pekara Bebeli Barang Kapit, Jubin Janggang lebuh ditelefon madah, opis iya nadai nerima sebarang riput pasal penanggul nya sereta deka mansik kebuah stuk nya bedau datai. — Bernama