KUCHING: Kampung Buntal ti urung 30 Km penyauh ari mengeri Kuching deka bisi seiti palan ngelantang ati ke chukup manah lalu disadang ulih nyaup ngangkatka industri Nyemilik pelilih Santubong.
Digaga nebing tasik ba tanah ke mesai 1.2 ikar, palan nya disikap enggau bansal endur bejualka mayuh macham pemakai sereta mega bansal endur bejualka asil ari pengelandik jari.
Palan endur bemain, rekresyen sereta palan endur nginti mega bisi disedia lalu dikearap nyadi sebagi ari produk program nyemilik di genturung pendiau nya.
Projek ke beungkus RM3.7 juta nya dipungkal kena bulan Mac 2013 lalu tembu digaga kena bulan Mei 2014.
Ba pengawa meri penerang sentang pejalai operasyen palan nya ke diatur di Opis Dagang Temuai Sarawak ba Begunan Baitulmakmur kemari, Kaban Parlimen Santubong Dato Sri Wan Junaidi Tuanku Jaafar ngarapka palan nya ulih ngepunka operasyen enggau naka pengelengkas.
Ku iya ke mega Sapit Menteri Dalam Menua, peranak kampung nya udah lama nganti palan nya dibuka pengudah tembu digaga dalam bulan Mei 2014.
“Palan tu udah lama tembu digaga tang bedau ngepunka operasyen, peranak kampung keran deka muka dagang sida,”ku iya.
Berindik enggau nya, iya ngansak Dewan Bandaraya Kuching Utara (DBKU) ti udah diberi pangku pengawa nusun atur operasyen ba palan nya ulih nentuka operasyen dipejalai enggau lengkas.
Operasyen lama tejanggal pengudah nadai seiti ejensi sanggup bejalaika operasyen ba endur nya pengudah tembu digaga.
Beserimbai enggau nya kemari, DBKU udah dipadu nyadi ejensi ngemata semua pejalai operasyen, ke alai SEDC enggau opis dagang temuai matak diri ari ngesan tanggungpengawa dia.
Sekreteri Mendam Opis Dagang Temuai Sarawak, Datu Ik Pahon lebuh dikerandau madah, palan ke bedau diberi nama nya disadang dipenyadi kena bulan April 2015 tu beserimbai enggau Pesta Buntal.
Sebedau nya, iya madahka diri deka meda palan nya dulu ngambika nemu bengkah pengawa ke patut diadu sebedau palan nya diserah ngagai DBKU.
“Minggu seiti tu ila kami deka ngabas palan nya lalu beratika enti bisi penimpang ba perengkaguna ti disediaka. Perintah bisi ngagihka RM4.5 juta ungkup projek nya lalu diatu kitai bisi laluh duit nya ti tau dipelanja dikena nambahka perengka guna ba palan nya” ku iya.