NGAYANKA PENYINU: Hamdan (enam kanan), Awangku Mohd Najib (lima kanan), Siti (empat kanan) begulai enggau staf Sepital Sri Aman pengudah atur pengawa nya ditu, pagi ensanus.
SRI AMAN: Sepital Pelilih Sri Aman mujur ngumpul 50 kutak penuh enggau barang pemakai, gari sereta mayuh bansa bantu bukai kena mantu sekeda peranak Semenanjung Malaysia ke tasah laban bah.
Nengah atur pengawa ke dikumbai ‘Program Sri Aman Prihatin’ diatur ba Bangunan Persekutuan Perkumpulan Wanita (PPWS) Pelilih Mit Sri Aman ditu pagi kemari, Pemesai Pekereja Rama Sepital Sri Aman Siti Nurashikin ke alai iya nyuaka bantu nya ngagai chairman pengatur ‘Program Sri Aman Prihatin’, Hamdan Katang.
Lebuh dirandau, Siti madah, bantu nya dikearap ulih ngelempungka pemar ti nating sekeda peranak Semenanjung Malaysia ti dituntung tasah bah.
“Kami arapka bantu tu ulih nyaup ngelempungka tating pengidup sida di Pantai Timur Semenanjung be balat ditungung penusah bah seraya ngajihka penanggul nya ngetu jampat,” ku iya.
Berebak enggau nya, chairman pengatur ‘Program Sri Aman Prihatin’ Hamdan Katang madah, kenyau program nya berengkah dipejalai kena 31 Disember 2014, piak sida nerima penemu ari mensia mayuh ke deka nyaup rayat semenanjung ti dituntung penusah nya.
Ku iya, piak sida udah mayuh nerima pemeri baka pemakai, gari, ampin nembiak ari orang ti ngatika diri, serakup, kelab, piak peribit sereta ari pengereja pengawa perintah.
Kemari mega, nengah bantu 13 Rejimen Askar Melayu Diraja (RAMD) Kem Pakit begulai enggau piak Sepital Sri Aman bisi nyuaka bantu.
Bela bisi ngulu atur pengawa nya, Pemesai Opis Pengintu Pengelantang Pendiau Raban Bansa Sri Aman, Awangku Mohd Najib Pengiran Mohamad ke mega chairman pengatur komiti bantu nya.