MARUDI: Ninting pagi, endang semampai bisi dipeda orang bedajaka Ikan Tapah di pasar Marudi.
Ikan tu ulih raban orang berikan ari Kuala Tutoh, Kampung Benawa sereta peranak rumah panjai Kayan/Iban ke bepalan ba Sungai Tinjar.
Nitih tinjau, Ikan Tapah nya dijual enggau rega RM38 sekilo, tang lebuh maya ikan nya enda mayuh ulih tauka ukai musim iya, dia ikan nya dijual mar mimit entara RM40 ngagai RM45 sekilo.
Berindik ari penusah tasah bah ke bisi nyadi empai lama ba sekeda genturung pendiau di puak pelilih menua Baram, raban orang berikan ditu chukup untung laban mayuh teulihka Ikan Tapah.
Kelimpah ari Ikan Tapah, pelilih menua Marudi mega chukup tebilang enggau Ikan Baong ke dijual enggau rega RM20 sekilo. Ikan Keli enggau Ikan Mengalan mega bisi ditemu ditu.
Tang pagi kemari, seiku orang berikan ke semina dikelala enggau nama “Janggut” bisi meli lebih ari 10 kilogram Undang Galah ke dibeli iya ari seiku orang berikan enggau rega RM55 sekilo. Tang udah nya iya nyual Undang Galah nya baru ngagai pemeli bukai enggau rega RM65 sekilo.
Ninting pagi, Ikan Tapah seruran bisi dipeda dijual ba palan bedaja baka nya mega nebing Sungai Marudi.