KUCHING: Sama enggau bansa Dayak ke bukai, raban Keristin ari raban bansa Bidayuh nyendiaka diri ngintu Hari Krismas ke diintu seharitu enggau umbas iya pengerami enti dibandingka enggau pengerami Gawai Dayak.
Tinjau ari raban pemberita Utusan Borneo ngagai pelilih menua Padawan kemari, tebal agi peranak genturung pendiau nya nyendiaka diri besembiang malam (24 Disember) enggau sembiang seharitu (25 Disember).
Seiku peranak pelilih menua nya lebuh ke ditanya, Rabe Sabong, 64, ari Genturung Pendiau Benuk, Padawan madah, pengerami Hari Krismas diintu enggau umbas iya pengerami ninting taun sereta nerima pengabang ari mayuh pupu bansa.
Rabe ke bepinchin ari gawa ba Opis Betanam Betupi madah, sida iya sebilik lama udah nyendiaka diri meresi kandang rumah sereta nyendiaka sekeda barang tauka kereban ke diguna.
“Baka taun ke udah maya Hari Krismas, kami sebilik nerima pengabang ari mayuh macham pupu bansa nyengkaum bansa Melayu, Cina enggau ke bukai.
“Kami sebilik engka nyelai ari orang bukai laban pengabang kami bisi ari raban bansa Melayu, tiap taun aku minta kaban aku ke bansa Melayu nyayat tauka munuh itit tauka manuk ngambika bisi dipanduk malam tu (kemari) lalu dibantaika nyerumba Hari Krismas pagila (seharitu),” ku iya.
Nambahka nya, Endun Likong, 38, peranak Rumah Panjai Annah Rais, lebuh dirandau mega madahka sida udah nyikap diri ari semua sukut dikena ngerami Hari Krismas.
Ku Endun, iya semina nyendiaka pemakai asal baka asi pulut sereta pemakai bukai nyengkaum rendang enggau kari dikena sida sebilik beserumpu makai malam mantar Krismas.
“Baka ke ngelama tu, ninting Hari Krismas kami endang besedia dalam semua sukut sereta ngintu pengerami enggau umas iya pengerichah. Tang pekara ke pemadau beguna iya nya kami besembiang ngagai gerija lalu pagila (seharitu) mega besembiang Hari Krismas,” ku iya.
Kelimpah ari nya, Baki Samen, 52, ari Rumah Panjai Annah Rais mega sepenemu madahka Hari Krismas diintu enggau umbas iya pengerami enti dibandingka enggau pengerami Gawai Dayak ke diintu enggau naka pengerami.
Taja pia, ku iya, sida sebilik tetap nyendiaka diri nyambut Hari Krismas sereta nyendiaka pemakai dikena makai serumpu enggau diri sebilik lebuh malam mantar Krismas.
“Pengerami Hari Krismas endang diintu enggau tengan pengerichah enti dibandingka enggau Gawai Dayak, tambah mega laban ti nyendiaka belanja dikena bala sekula,” ku Baki.