KUCHING: Semua rayat di negeri tu diperansang terus ngenegapka penyerakup ti nyadi pemun ngagai pemaik enggau pengelantang pengidup sereta ngerembaika ekonomi negeri.
Pemangku Tuai Pemegai Menua (TYT) Nengeri Sarawak, Datuk Amar Mohd Asfia Awang Nassar madahka, penyerakup rayat enggau politik ti likun chukup beguna dikena nambahka puku sereta ngerembaika pengawa dagang.
“Perintah nengeri udah ngelangkar perambu enggau program pemansang ti bisi atur sereta udah mujur nyungkak ekonomi nengeri tu terus bediri tegap.
“Pengawa perintah tu deka dikemanahka agi nengah ulah majoriti rayat tauka peranak nengeri ti seruran ngemaruhka diri kelimpah ari ngemeratka penyerakup sereta enda mantaika isu sensitif ke ulih ngeruga pemaik enggau pengelantang nengeri,” ku iya.
Iya mansutka jaku lalau nya nyerumba pengerami Hari Krismas 2014 ke deka diintu semua raban pengarap Keristin di serata menua.
Nangkanka nya, iya mega madahka perintah nengeri deka terus komited sereta chakah dalam nyungkak pemansang ekonomi enggau ngangkatka pemanah rama ke tau meri pengelantang enggau pemaik ngagai semua rayat.
Nya nyengkaum projek pemansang Koridor Energi ke Ulih Dikena Baru Sarawak (SCORE) ke mungkur 57 peratus nengeri tu, ke ulih mantu nengeri tu nyadi menua mansang manggai taun 2020, pia ku iya.
Ku iya nandu, dikena nentuka pemansang enggau penegap ba dunya penemu enggau teknologi pemadah ti seruran mansang, pengawa ngangkatka penemu patut ditambahka agi.
Berindik ari nya ku iya, rebak baru kemaya hari tu patut belajar bebendar sereta ngemeratka pengawa sekula sida nyentuk ngagai tikas ke pemadu tinggi iya nya renggat universiti kelimpah ari nampung pelajar dalam bidang ke dikerindu.
“Kitai mega berasai temegah ati enggau juluk perintah nengeri ke deka nentuka raban ekstrem ti nabur sereta ngerembaika ulah radikal sida, ke ditangang ari tama ngagai nengeri tu.
“Kitai temegah ati laban tebal agi rayat kitai ulih meretika juluk perintah ti deka ngemuntanka sida nya (raban ekstrem) lalu deka terus ngetanka penyerakup ti nyadi pun pemansang menua kelebih agi nengeri tu ke endang bepanggai ba penegap enggau penyerakup,” ku iya.
Bekaul enggau pengerami Hari Krismas, ku Asfia, endang udah asal raban bansa Sarawak ti diuan mayuh pupu bansa ke ngembuan jalai pengarap ke bebida sama ngerami tiap pengerami ke diintu taja pan enda sama pengarap.
“Pengawa ngabang ngagai pangan diri tu sebengkah chara dikena ngerapitka kaul entara raban bansa enggau jalai pengarap, lalu chara tu udah lama dikemeran dikena ngenanka pengelantang pengidup semua mensia,” ku iya.