SIBU: Parti Rakyat Bersatu Sarawak (SUPP) Pampang Dudong bisi ngenataika bantu mata duit beungkus RM10,000 dikena mantu seiku orang dagang ke ditinggang ukum mayar ganti rugi tauka pampas RM200,000 ke diputuska Kut Tinggi kena 26 November empai lama ti udah.
Chairman SUPP Pampang Dudong, Datuk Dr Soon Choon Teck madah, SUPP Dudong sebengkah pampang ti keterubah nyaut peminta enggau jaku peransang indu opis SUPP dikena mantu orang dagang nya ke mega raban parti SUPP, Teng Ung Woo.
“Kitai patut nyaup sebarang raban parti tauka kaban parti tu ke napi sebarang penusah dikena mandangka pengibuh enggau penyiru kitai ngagai semua raban parti ke diau dalam parti tu,” ku iya.
Iya mansutka jaku nya ba awak pengarang berita pengudah tembu nyuaka bantu nya ba kelinik iya ditu, kemari.
Kena 26 November empai lama ke udah, Kut Tinggi Sibu udah mutuska Teng dipinta mayar ganti rugi RM200,000 sereta ungkus guaman RM35,000 ngagai Wong Ling Biu ketegal petenah ke digaga iya.
Berindik ari nya, Komiti Kereja Pusat SUPP ngaga pemutus minta semua 47 iti pampang SUPP di nengeri tu ngatur sebengkah kimpin ngulihka belanja dikena mantu Teng Ung Woo mayar ganti rugi ke melempai ba iya.
Nitihka penerang ari Dr Soon, bantu nya asil duit gumpul ari raban SUPP Pampang Dudong.
“Kitai deka nyaup Teng dalam mutarka pekara tu enggau naka ulih. Nya alai, aku minta sereta ngelalau semua 47 bengkah pampang SUPP ngambi ngemeratka pekara tu,” ku iya.
Teng ke megai tanggungpengawa nyadi Sekretari Besai Pusat Raban Nembiak SUPP ke mega Ketuai Raban Nembiak SUPP Pampang Sarikei ngenataika pengaga ati iya sereta meri besai terima kasih ngagai raban parti SUPP ke bukai laban ti udah nyaup iya ngelempungka tating penanggul ke nating iya.